“AQSH o‘z qo‘shinlarining uchdan bir qismini Yevropadan olib chiqishi mumkin” — Politico

Amerika qo‘shma shtatlari Yevropadagi qo‘shinlari sonini 30 foizga qisqartirishi mumkin. Bu haqda Politico o‘z manbalariga tayanib xabar berdi.

Ma’lum qilinishicha, AQSH Pentagon rahbarligida butun dunyo bo‘ylab o‘zining harbiy mavjudligini keng ko‘lamli qayta baholash — Global kuchlar joylashuvi sharhini (Global Force Posture Review) o‘tkazmoqda.

Uning maqsadi Amerika kuchlarini o‘zgarayotgan global ustuvorliklarga, ayniqsa Hind-Tinch okeani mintaqasidagi kuchayib borayotgan keskinlik va AQSHning tashqi xarajatlarini kamaytirish bosimiga muvofiq qayta guruhlashdir. Yakuniy hisobot sentyabrgacha e’lon qilinishi kutilmoqda.

Germaniya tashqi siyosat kengashining xavfsizlik siyosati bo‘yicha katta ilmiy xodimi Aylin Matle ta’kidlashicha, Global kuchlar sharhining ehtimoliy natijalaridan biri Rossiyaning Ukrainaga keng ko‘lamli bosqinidan so‘ng 2022-yilda o‘sha paytdagi prezident Jo Bayden davrida Yevropaga yuborilgan 20 mingga yaqin amerikalik harbiy xizmatchilarning qaytarilishi bo‘ladi.

Uning qo‘shimcha qilishicha, bu hali ham sezilarli Amerika mavjudligini bildiradi, qit’adagi Amerika qo‘shinlarining hozirgi soni 90 mingdan 100 minggacha kishini tashkil etadi.

Biroq boshqa ma’lumotlarga ko‘ra, qisqartirish ancha katta bo‘lishi mumkin.

“Ismini oshkor qilishni istamaydigan NATO amaldorlaridan biri Politico nashriga Yevropadagi qo‘shinlar soni 30 foizgacha qisqarishi mumkinligini ochiqchasiga aytdi. Bu esa yanada keng ko‘lamli qayta guruhlanishni anglatadi”, deydi mualliflar.

Germaniyada Yevropaning boshqa mamlakatlariga qaraganda ancha ko‘p amerikalik askarlar joylashgan. Ushbu mamlakatda 35 000 ga yaqin amerikalik harbiy xizmatchi 35 ga yaqin munitsipalitetda xizmat qilmoqda. Ularga AQSH havo operatsiyalari va sun’iy yo‘ldosh aloqasining markaziy tugunini tashkil etuvchi Ramshtayn aviabazasi; harbiy ma’lumotlarga ko‘ra, Qo‘shma Shtatlardan tashqarida AQSH armiyasining eng yirik o‘quv poligoni bo‘lgan Grafenver, shuningdek, harbiy xizmatchilar uchun muhim shtab-kvartira kiradi.

Biroq Aylin Matlening ta’kidlashicha, AQSHning Yevropada bo‘lishi Vashington manfaatlariga ham xizmat qiladi.

“Ramshtayn kabi bazalar nafaqat Yevropa mudofaasi uchun, balki Yaqin Sharq va ma’lum darajada Afrikaga kuchlarni yo‘naltirish uchun ham ishlatiladi. Masalan, Yevropa dunyoning boshqa qismlariga Amerika harbiy texnikasini yetkazib berish uchun “o‘tish punkti” vazifasini o‘tagan”, dedi u.