Isroil va AQSH delegatsiyasi Qatar poytaxti Dohada bo‘lib o‘tayotgan G‘azoda o‘t ochishni to‘xtatish muzokaralarini tark etdi. Bu haqda BBC xabar berdi.
Vashington tark etish qarorini HAMASning “yaxshi niyatda harakat qilmayotgani” bilan izohladi. AQSHning maxsus elchisi Stiv Uitkoff o‘z bayonotida shunday dedi:
“Biz HAMASning G‘azoda o‘t ochishni to‘xtatishga erishish istagi yo‘qligiga amin bo‘ldik. Shundan so‘ng jamoamizni Dohadan uyga qaytarib olib ketishga qaror qildik”.
Bu orada Isroil hukumati uning muzokaralarni tark etishiga nima sabab bo‘lganini ochiqlamagan. Xususan, Isroil bosh vaziri Binyamin Netanyaxu ham yahudiy delegatlari nima uchun Dohani tark etgani haqida hozircha ochiq gapirmayapti. Biroq mahalliy ommaviy axborot vositalarida Isroilning yuqori martabali amaldoridan iqtibos keltirilib, muzokaralarda “natija bo‘lmagani” ma’lum qilingan.
HAMAS ham bu borada izoh bermagan. Muzokaralarda ishtirok etgan barcha tomonlar, jumladan, vositachilar ham asosiy masalalarda ijobiy o‘zgarish va yechim yo‘qligini aytgan. 24-iyul kungi bayonotida Uitkoff vositachilar katta sa’y-harakatlarni amalga oshirgan bo‘lsa-da, HAMAS bundan “qoniqmagandek tuyulganini va u vijdonan harakat qilmaganini” bildirgan.
“Endi biz garovga olinganlarni uyga qaytarishning muqobil variantlarini ko‘rib chiqamiz. G‘azo aholisi uchun yanada barqaror muhit yaratishga harakat qilamiz. HAMASning bunday xudbinona yo‘l tutgani achinarli. Biz bu mojaroga barham berish va G‘azoda abadiy tinchlik o‘rnatishga intilishdan to‘xtamaymiz”, dedi Uitkoff.
Ma’lumot uchun, Dohadagi muzokaralarning navbatdagi raundi Qatar va Misr vositachiligida ikki haftadan ko‘proq davom etdi. Bundan oldinroq Isroil rasmiysi HAMASning o‘t ochishni to‘xtatish taklifini ma’qullagani aytilgandi.
BMTning Falastin qochqinlari bo‘yicha agentligi 24-iyul kuni G‘azo shahridagi har beshinchi bola ocharchilikdan aziyat chekayotganini va kasallanish holatlari kundan kunga ko‘payib borayotganini ma’lum qildi.
100 dan ortiq xalqaro yordam tashkilotlari va inson huquqlari guruhlari ham ommaviy ocharchilikdan xavotir bildirib, dunyo mamlakatlarini tegishli choralar ko‘rishga da’vat qilmoqda. Barcha ta’minotlarning G‘azoga kirishini nazorat qiluvchi Isroil davlati bir necha bor sektor qamal qilinmaganini aytib, HAMASni ocharchilik keltirib chiqarishda ayblamoqda.
Izoh (0)