Исроил ва АҚШ делегацияси Қатар пойтахти Доҳада бўлиб ўтаётган Ғазода ўт очишни тўхтатиш музокараларини тарк этди. Бу ҳақда BBC хабар берди.
Вашингтон тарк этиш қарорини ҲАМАСнинг “яхши ниятда ҳаракат қилмаётгани” билан изоҳлади. АҚШнинг махсус элчиси Стив Уиткофф ўз баёнотида шундай деди:
“Биз ҲАМАСнинг Ғазода ўт очишни тўхтатишга эришиш истаги йўқлигига амин бўлдик. Шундан сўнг жамоамизни Доҳадан уйга қайтариб олиб кетишга қарор қилдик”.
Бу орада Исроил ҳукумати унинг музокараларни тарк этишига нима сабаб бўлганини очиқламаган. Хусусан, Исроил бош вазири Биньямин Нетаньяху ҳам яҳудий делегатлари нима учун Доҳани тарк этгани ҳақида ҳозирча очиқ гапирмаяпти. Бироқ маҳаллий оммавий ахборот воситаларида Исроилнинг юқори мартабали амалдоридан иқтибос келтирилиб, музокараларда “натижа бўлмагани” маълум қилинган.
ҲАМАС ҳам бу борада изоҳ бермаган. Музокараларда иштирок этган барча томонлар, жумладан, воситачилар ҳам асосий масалаларда ижобий ўзгариш ва ечим йўқлигини айтган. 24 июль кунги баёнотида Уиткофф воситачилар катта саъй-ҳаракатларни амалга оширган бўлса-да, ҲАМАС бундан “қониқмагандек туюлганини ва у виждонан ҳаракат қилмаганини” билдирган.
“Энди биз гаровга олинганларни уйга қайтаришнинг муқобил вариантларини кўриб чиқамиз. Ғазо аҳолиси учун янада барқарор муҳит яратишга ҳаракат қиламиз. ҲАМАСнинг бундай худбинона йўл тутгани ачинарли. Биз бу можарога барҳам бериш ва Ғазода абадий тинчлик ўрнатишга интилишдан тўхтамаймиз”, деди Уиткофф.
Маълумот учун, Доҳадаги музокараларнинг навбатдаги раунди Қатар ва Миср воситачилигида икки ҳафтадан кўпроқ давом этди. Бундан олдинроқ Исроил расмийси ҲАМАСнинг ўт очишни тўхтатиш таклифини маъқуллагани айтилганди.
БМТнинг Фаластин қочқинлари бўйича агентлиги 24 июль куни Ғазо шаҳридаги ҳар бешинчи бола очарчиликдан азият чекаётганини ва касалланиш ҳолатлари кундан кунга кўпайиб бораётганини маълум қилди.
100 дан ортиқ халқаро ёрдам ташкилотлари ва инсон ҳуқуқлари гуруҳлари ҳам оммавий очарчиликдан хавотир билдириб, дунё мамлакатларини тегишли чоралар кўришга даъват қилмоқда. Барча таъминотларнинг Ғазога киришини назорат қилувчи Исроил давлати бир неча бор сектор қамал қилинмаганини айтиб, ҲАМАСни очарчилик келтириб чиқаришда айбламоқда.
Изоҳ (0)