Xitoyning Xebey provinsiyasida kuchli yomg‘irdan so‘ng yuzaga kelgan ko‘chki oqibatida kamida 4 kishi halok bo‘lib, yana 8 nafar odam bedarak yo‘qoldi. Bu haqda mahalliy ommaviy axborot vositalariga tayanib Arab News xabar berdi.
Ko‘chki Chendu shahri yaqinidagi qishloqda ro‘y bergan. Rasmiylarga ko‘ra, bu tabiiy ofat “g‘ayrioddiy kuchli yog‘ingarchilik” tufayli sodir bo‘lgan. Xebeyda yuzaga kelgan jiddiy suv toshqinlarini o‘rganish uchun favqulodda vaziyatlar boshqarmasi maxsus guruh yuborgan. Fupin okrugida 4 600 dan ortiq odam xavfsiz hududlarga ko‘chirilgan.
Qo‘shni Shansi provinsiyasida esa avtobus halokati oqibatida 13 kishi bedarak yo‘qolgan, bir nafar shaxs qutqarib olingan. Poytaxt Pekinda ham kuchli yomg‘ir oqibatida shahar chekkasidagi Miyun provinsiyasida 3 mingdan ortiq odam evakuatsiya qilingan. Bu hududdagi suv omborida 60 yil ichida eng katta suv hajmi qayd etilgan.
28-iyul kuni ombor yaqinidagi Mujiyayu shaharchasida elektr liniyalari loy oqimi bilan yuvib ketilgan. Pekin hukumati yomg‘ir bo‘yicha ikkinchi, toshqinlar bo‘yicha esa eng yuqori darajadagi ogohlantirish e’lon qilgan. Kuchli yog‘ingarchilik 29-iyulgacha davom etishi prognoz qilingan.
Xitoyda yoz oylarida tabiiy ofatlar — kuchli yomg‘ir va jazirama issiq odatiy holga aylangan. Mamlakat global iqlim o‘zgarishiga sabab bo‘luvchi issiqxona gazlari ishlab chiqarishda yetakchi sanaladi. Shu bilan birga, Xitoy 2060-yilgacha uglerod neytralligiga erishishni maqsad qilgan.
Izoh (0)