Litvalik dizayner Simonas Palovis ishda stress va g‘azabni boshqarish uchun mo‘ljallangan yangi interaktiv o‘yinchoq ishlab chiqdi. OLLY deb ataluvchi bu ixcham qurilma ko‘rinishidan turli yuz ifodasiga ega yumshoq stol o‘yinchog‘iga o‘xshaydi, lekin aslida u anti-stress funksiyasini ham bajaradi.
OLLYga jismoniy ta’sir o‘tkazilganda, masalan, uni siqqanda, chimchilaganda, urganda yoki ezganda u yuz ifodasini o‘zgartiradi, bu esa interaktivlik effektini beradi. O‘yinchoq turli mexanik harakatlarga bardosh bera oladi, uning materiali esa uzoq muddat foydalanganda ham o‘z shaklini yo‘qotmaydi.
OLLYni ishlab chiqish g‘oyasi Palovisning shaxsiy tajribasidan kelib chiqqan. Ilgar ofisda ishlagan vaqtida u ko‘p marta jahlini bosa olmagan. Shu sababli dizayner ushbu qurilmani g‘azabni ochiqchasiga namoyon qilish noo‘rin bo‘lgan holatlarda foydalanish uchun ishlab chiqqan. Masalan, OLLY yordamida ofisda salbiy his-tuyg‘ularni xavfsiz ifoda etish mumkin.
Bundan avval Palovis boshqa bir nechta innovatsion loyihalarni ham yaratgan. Xususan, Axis nomli transformer stol hamda 2018-yilda Design Award mukofotini olgan WEE! stoli uning g‘oyasi. Shuningdek, u Electrolux Design Lab tanlovida namoyish etilgan Bud loyihasining muallifi hisoblanadi.
Hozircha OLLY o‘yinchog‘ining texnik xususiyatlari, jumladan, material tarkibi, yuz ifodasini o‘zgartirish uchun javobgar elektron tizim haqida ma’lumot ochiqlanmagan.
Izoh (0)