Janubiy Koreya hukumati Shimoliy Koreya bilan munosabatlarni yaxshilash uchun turli rejalarni ko‘rib chiqmoqda. Bu haqda Koreyalararo masalalar bo‘yicha Birlashuv vazirligi matbuot kotibi Ku Byon Sam ma’lum qildi.
KXDRga sayohatlarni tashkil etish ko‘rib chiqilayotgani haqida xabarlar tarqaldi. Ku Byon Sam bunga izoh berishdan bosh tortgan. Biroq u yakka tartibdagi sayohatlar xalqaro sanksiyalarga zid emasligini tushuntirdi.
Turizm Shimoliy Koreya uchun BMT sanksiyalari ostiga kirmagan kam sonli daromad manbalaridan biridir. Sanksiyalar, asosan, Pxenyanning yadroviy va raketa dasturlariga qaratilgan.
Janubiy Koreya prezidenti Li Chje Myon Pxenyanga nisbatan keskin munosabatlarni tiklashga va’da bergan. U aloqalarni yumshatish uchun chegarada Shimoliy Koreyaga qarshi eshittirilayotgan radiokarnaylar faoliyatini to‘xtatgan. Shimol Koreya rahbarlarini tanqid qiluvchi varaqalar tarqatish taqiqlangan.
Prezidentning aytishicha, u Shimoliy Koreya bilan muloqotni qayta yo‘lga qo‘yishni yuqori darajadagi xavfsizlik maslahatchilari bilan muhokama qiladi. Rasmiy ravishda, Janubiy va Shimoliy Koreya hanuz urush holatidadir.
Shimoliy Koreya yaqinda Vonsan shahrida dengiz bo‘yida kurort hududini ochgan edi. Bu loyihaga Kim Chen Inning shaxsan o‘zi rahbarlik qilgan. Biroq 16-iyul kuni ushbu hudud hozircha xorijiy sayyohlarni qabul qilmayotgani ma’lum bo‘lgan.
Janubiy Koreya bir paytlar Shimoliy Koreyaning Kumgang tog‘i hududiga sayohatlar uyushtirgan. Biroq 2008-yilda janubiy koreyalik sayyoh Shimoliy Koreya askari tomonidan otib o‘ldirilgach, bu sayohatlar to‘xtatilgan edi.
Izoh (0)