Estoniya hukumati 24-iyul kuni Belarus prezidenti Aleksandr Lukashenko va 272 nafar davlat amaldorlariga mamlakatga kirishni umrbod taqiqlovchi qonun chiqardi. Bu haqda Anadolu xabar berdi.
Estoniya rasmiylarining ta’kidlashicha, sanksiyalar ro‘yxatiga yuqori martabali amaldor, sudya, huquq-tartibot idoralari xodimlari, davlat tashviqoti vakillari va Belarus prezidentiga yaqin bo‘lganlar kiritilgan. Bu tashabbus tashqi ishlar vaziri Margus Saxkna tomonidan ilgari surilgan.
Unga ko‘ra, Belarusda inson huquqlari bilan bog‘liq vaziyat o‘zgarishsiz qolmoqda. Minskning Ukrainadagi harbiy operatsiyasini qo‘llab-quvvatlashi vaziyatni yanada murakkablashtirib, Estoniyani choralar ko‘rishga majbur qilmoqda.
Belarusga qarshi choralar Estoniya tomonidan birinchi marta 2020-yilda mamlakatdagi prezidentlik saylovlaridan keyin norozilik namoyishlari fonida kiritilgandi. Keyin esa u cheklangan muddatga uzaytirilgandi.
“Sanksiyalar joriy etilganidan beri o‘tgan qariyb 5 yil ichida hech qanday ijobiy o‘zgarish bo‘lmadi. Biz davom etayotgan repressiyalarga ko‘z yuma olmaymiz. Shuning uchun cheklovlar saqlanib qolishi kerak”, degan Sakxna.
Estoniya rasmiylari, Yevropa Ittifoqining boshqa bir qator davlatlari singari, Aleksandr Lukashenkoni Belarusning qonuniy prezidenti sifatida tan olmaydi.
Belarus prezidentining taqiqqa munosabati
Belarus prezidenti matbuot kotibi Natalya Eysmontning ma’lum qilishicha, Aleksandr Lukashenko Estoniyaning taqiqiga istehzoli munosabat bildirgan.
Prezidentning bu “katta” yangilikka munosabatini ochiqlashim mumkin. Prezident so‘zma-so‘z shunday dedi: “Afsuski, men Estoniyada hech qachon bo‘lmaganman... Sanksiyalar joriy etilgandan keyin esa o‘ylab qoldim — tirik qolarmikanman?”, degan Natalya.
Izoh (0)