Эстония ҳукумати 24 июль куни Беларусь президенти Александр Лукашенко ва 272 нафар давлат амалдорларига мамлакатга киришни умрбод тақиқловчи қонун чиқарди. Бу ҳақда Anadolu хабар берди.
Эстония расмийларининг таъкидлашича, санкциялар рўйхатига юқори мартабали амалдор, судья, ҳуқуқ-тартибот идоралари ходимлари, давлат ташвиқоти вакиллари ва Беларусь президентига яқин бўлганлар киритилган. Бу ташаббус ташқи ишлар вазири Маргус Сахкна томонидан илгари сурилган.
Унга кўра, Беларусда инсон ҳуқуқлари билан боғлиқ вазият ўзгаришсиз қолмоқда. Минскнинг Украинадаги ҳарбий операциясини қўллаб-қувватлаши вазиятни янада мураккаблаштириб, Эстонияни чоралар кўришга мажбур қилмоқда.
Беларусга қарши чоралар Эстония томонидан биринчи марта 2020 йилда мамлакатдаги президентлик сайловларидан кейин норозилик намойишлари фонида киритилганди. Кейин эса у чекланган муддатга узайтирилганди.
“Санкциялар жорий этилганидан бери ўтган қарийб 5 йил ичида ҳеч қандай ижобий ўзгариш бўлмади. Биз давом этаётган репрессияларга кўз юма олмаймиз. Шунинг учун чекловлар сақланиб қолиши керак”, деган Сакхна.
Эстония расмийлари, Европа Иттифоқининг бошқа бир қатор давлатлари сингари, Александр Лукашенкони Беларуснинг қонуний президенти сифатида тан олмайди.
Беларусь президентининг тақиққа муносабати
Беларусь президенти матбуот котиби Наталя Эйсмонтнинг маълум қилишича, Александр Лукашенко Эстониянинг тақиқига истеҳзоли муносабат билдирган.
Президентнинг бу “катта” янгиликка муносабатини очиқлашим мумкин. Президент сўзма-сўз шундай деди: “Афсуски, мен Эстонияда ҳеч қачон бўлмаганман... Санкциялар жорий этилгандан кейин эса ўйлаб қолдим — тирик қолармиканман?”, деган Наталя.
Изоҳ (0)