O‘zbekistonda ekologiyaga yetkazilgan zarar uchun jarimani oshirish taklif qilinmoqda. Deputat Alisher Qodirov bu haqdagi qonunga eʼtirozlar borligini bildirdi.
“Milliy tiklanish” partiyasi raisi Alisher Qodirov qator muammolarni hal qilmasdan oldin jarimalarni ko‘paytirish noto‘g‘ri ekanini aytdi.
“Shahar ichida sug‘orish, drenaj tizimlari yo‘q, lekin daraxtlarni sug‘orish kerak. Krandan sug‘orilsa, jarima yozilyapti. Masalan, havo 50-55 daraja issiqqa chiqyapti. Shahar ichida yashaydigan aholiga krandan boshqa suv keladigan manba yo‘q. Lekin undan foydalansa, noto‘g‘ri foydalanilyapti, deb jarima yozilyapti. Ular nima qilishi kerak? Ko‘zi bilan ko‘rib turishi kerakmi daraxtlar qurishini? Sharoit yaratmasdan jazoni kuchaytirib qo‘ymayapmizmi?
Shahardagi mahallalarda chiqindini olib chiqib ketish tizimi bir haftada bir marta keladi. Yetti kunning ichida olti kun odamlar chiqindisini qayerga yig‘ishi kerak? O‘ziga madaniyatni olib, shakllantirgan odamlar amallab bir joyga yig‘adi. Kimlardir olyapti-da, lekin shaharda ko‘chaga tashlab ketib qolyapti. Biz ularni ushlaymiz, hozir endi bu qonun bo‘yicha jazolaymiz. Biz sharoit yaratib bermadik-ku hali. Odamlardan ekologik madaniyatni talab qilyapmiz, to‘g‘ri. Talab qilayotganlarning o‘zi oldin sharoit yaratib berib qo‘yish degan masʼuliyatini bajarib qo‘yishi kerak emasmi”, deya fikr bildirgan deputat.
Alisher Qodirov atrof-muhitni asrash, ekomadaniyat — hayotiy ehtiyoj sifatida tarbiya bilan singdirilishi kerakligiga urg‘u bergan.
“Shunday emasligi uchun daraxtni kesish va sug‘orishni bir toifadagi huquqbuzarlik sifatida o‘ylay olamiz. Ekologiyaga yetkazilgan zarar uchun jarimani ko‘paytirish taklif qilinayotgan qonun loyihasiga eʼtirozlarimiz bor”, degan parlament vakili.
Avvalroq deputat daraxtlar kesilishi masalasida ham fikr bildirgandi. Uning aytishicha, daraxtlar zarurat yuzasidan kesilishi mumkin bo‘lishi kerak.
Izoh (0)