Xitoy va Rossiya avgust oyida qo‘shma harbiy mashg‘ulotlar o‘tkazishni rejalashtirmoqda

Xitoy hukumati 30-iyul kuni Rossiya bilan birgalikda avgust oyida harbiy mashg‘ulotlar o‘tkazishini ma’lum qildi. Bu haqda Arab News xabar berdi.

Ta’kidlanishicha, mashg‘ulotlar doirasida Vladivostok yaqinida dengiz va havo amaliyotlari o‘tkazilib, Tinch okeanida qo‘shma dengiz patruli amalga oshiriladi.

Iqtisodiy va siyosiy aloqalar bilan bir qatorda, Moskva va Pekin so‘nggi yillarda harbiy sohada ham hamkorlikni chuqurlashtirmoqda. Bu ikki davlat AQSH yetakchiligidagi dominantlikka qarshi muvozanatni saqlashga intilmoqda.

“Joint Sea-2025 (Qo‘shma dengiz-2025) nomli mashg‘ulotlar ikki tomonlama doimiy hamkorlik rejasining bir qismi bo‘lib, uchinchi tomonlarga qaratilmagan”, dedi Xitoy mudofaa vazirligi vakili Zhang Syaogan.

2024-yilgi Joint Sea-2024 mashg‘ulotlari Xitoy janubiy sohilida o‘tkazilgan edi. Bu yilgi mashg‘ulotlar avgust oxirida Rossiya prezidenti Vladimir Putin Xitoyga rejalashtirilgan tashrifidan oldin o‘tkazilishi rejalashtirilmoqda.

Ma’lum bo‘lishicha, avgustda Putin Shanxay Hamkorlik Tashkiloti sammitida ishtirok etadi. Shuningdek, prezident ikkinchi jahon urushi tugashining 80 yilligi munosabati bilan o‘tkaziladigan harbiy parad va boshqa tadbirlarda qatnashadi. Xitoy yetakchisi Si Szinpin bilan ham muzokaralar bo‘lib o‘tishi bildirilgan.

Rossiya Ukrainaga 2022-yil fevral oyida bosqin boshlaganidan beri ikki davlat o‘rtasidagi aloqalar yanada mustahkamlangan. Xitoy Rossiyaning harbiy harakatlarini hech qachon tanqid qilmagan. Ko‘plab Ukraina ittifoqchilari esa Pekin Moskvaga yordam ko‘rsatayotganiga ishonadi.

Xitoy o‘zini neytral tomon deb atab, urushning tugashini muntazam ravishda talab qilib keladi. Shu bilan birga u G‘arb davlatlarini Ukrainani qurollantirib, urushni cho‘zayotganlikda ayblamoqda. Iyul oyida Xitoy rahbari Si Szinpin Rossiya tashqi ishlar vaziri bilan Pekinda o‘tgan uchrashuvda ikki davlat “o‘zaro yordamni kuchaytirishi” zarurligini ta’kidlagandi.