Fransiya prezidenti Emmanuel Makron va bosh vazir Fransua Bayruning ommabopligi reytingi mamlakat tarixidagi eng past ko‘rsatkichga yetdi. Bu haqda Ifop kompaniyasining Journal du Dimanche nashri uchun o‘tkazgan so‘rovnomasi yakunlarida ma’lum qildi.
“Makron va Bayru juftligi shu yilning iyul oyida Beshinchi respublika rahbarlarining eng ommalashmagan juftligiga aylanib, tarixga kirdi. Fransua Olland 2014-yil kuzida 13 foiz ijobiy baho bilan eng yoqimsiz prezident bo‘lib qolmoqda, ammo o‘shanda bosh vazir Manuel Vals 38 foizlik ma’qullash reytingiga ega edi. Ularning umumiy reytingi 51 ballni tashkil etgan. Emmanuel Makron 19 foizlik ma’qullash bilan va Fransua Bayru 18 foizlik ma’qullash bilan bor-yo‘g‘i 37 ball to‘plagan”, deb ta’kidlaydi tadqiqot mualliflari.
Ular Makronning ma’qullash reytingi ilgari hech qachon ramziy 20 foizdan pastga tushmaganini eslatishgan. Hatto “sariq nimchalilar” inqirozi avj olgan paytda ham bu ko‘rsatkich 23 foizni tashkil etgan, 2024-yil oxirida Mishel Barne hukumati iste’foga chiqqanida esa 21 foizga tushgan.
“2022-yilgi prezidentlik saylovlarining birinchi turida Makronga ovoz berganlar orasida uning qo‘llab-quvvatlashi 12 punktga tushib, 50 foizlik chegaradan ham pastga (49 foiz) tushdi. Shuningdek, u 2017 yilgi saylov kampaniyasi davomida “o‘ziniki” deb hisoblagan rahbarlar orasida 8 punkt va biznes yetakchilari orasida 18 punktni yo‘qotdi”, deb yozmoqda nashr.
Makronni tanqid qiluvchilar, avvalo, uning davlat byudjetining ayanchli ahvoli uchun javobgarligini ta’kidlashmoqda.
“Pullarimizni sovurmoqda”, “Qarz? Bu uning ishi!”, “Mamlakatni xarob qilmoqda”, “Fransiyani halokatga yetaklamoqda”, “Mamlakatni ongli ravishda vayron qilayotgan sotqin”, deya fransuzlarning fikrlarini keltiradi mualliflar.
Shu bilan birga, Bayru Beshinchi respublika tarixidagi eng ommalashmagan bosh vazirga aylangan. So‘rovda qatnashganlarning 82 foizi undan norozi, “o‘ta norozilar” ulushi esa 8 punktga (50 foiz) ko‘paygan.
Bosh vazirning ommalashmaganiga shu hafta taqdim etilgan 2026-yilgi byudjet to‘g‘risidagi qonun loyihasi sabab bo‘lgan. Fransuzlar uni “ijtimoiy adolatsiz” deb baholashmoqda.
So‘rovnoma 16-17-iyul kunlari onlayn tarzda o‘tkazilgan. Unda 18 va undan katta yoshdagi 1000 kishi ishtirok etgan.
Izoh (0)