Франция президенти Эммануэл Макрон ва бош вазир Франсуа Байрунинг оммабоплиги рейтинги мамлакат тарихидаги энг паст кўрсаткичга етди. Бу ҳақда Ifop компаниясининг Journal du Dimanche нашри учун ўтказган сўровномаси якунларида маълум қилди.
“Макрон ва Байру жуфтлиги шу йилнинг июль ойида Бешинчи республика раҳбарларининг энг оммалашмаган жуфтлигига айланиб, тарихга кирди. Франсуа Олланд 2014 йил кузида 13 фоиз ижобий баҳо билан энг ёқимсиз президент бўлиб қолмоқда, аммо ўшанда бош вазир Мануэл Валс 38 фоизлик маъқуллаш рейтингига эга эди. Уларнинг умумий рейтинги 51 баллни ташкил этган. Эммануэл Макрон 19 фоизлик маъқуллаш билан ва Франсуа Байру 18 фоизлик маъқуллаш билан бор-йўғи 37 балл тўплаган”, деб таъкидлайди тадқиқот муаллифлари.
Улар Макроннинг маъқуллаш рейтинги илгари ҳеч қачон рамзий 20 фоиздан пастга тушмаганини эслатишган. Ҳатто “сариқ нимчалилар” инқирози авж олган пайтда ҳам бу кўрсаткич 23 фоизни ташкил этган, 2024 йил охирида Мишел Барне ҳукумати истеъфога чиққанида эса 21 фоизга тушган.
“2022 йилги президентлик сайловларининг биринчи турида Макронга овоз берганлар орасида унинг қўллаб-қувватлаши 12 пунктга тушиб, 50 фоизлик чегарадан ҳам пастга (49 фоиз) тушди. Шунингдек, у 2017 йилги сайлов кампанияси давомида “ўзиники” деб ҳисоблаган раҳбарлар орасида 8 пункт ва бизнес етакчилари орасида 18 пунктни йўқотди”, деб ёзмоқда нашр.
Макронни танқид қилувчилар, аввало, унинг давлат бюджетининг аянчли аҳволи учун жавобгарлигини таъкидлашмоқда.
“Пулларимизни совурмоқда”, “Қарз? Бу унинг иши!”, “Мамлакатни хароб қилмоқда”, “Францияни ҳалокатга етакламоқда”, “Мамлакатни онгли равишда вайрон қилаётган сотқин”, дея французларнинг фикрларини келтиради муаллифлар.
Шу билан бирга, Байру Бешинчи республика тарихидаги энг оммалашмаган бош вазирга айланган. Сўровда қатнашганларнинг 82 фоизи ундан норози, “ўта норозилар” улуши эса 8 пунктга (50 фоиз) кўпайган.
Бош вазирнинг оммалашмаганига шу ҳафта тақдим этилган 2026 йилги бюджет тўғрисидаги қонун лойиҳаси сабаб бўлган. Французлар уни “ижтимоий адолатсиз” деб баҳолашмоқда.
Сўровнома 16-17 июль кунлари онлайн тарзда ўтказилган. Унда 18 ва ундан катта ёшдаги 1000 киши иштирок этган.
Изоҳ (0)