AQSH prezidenti Donald Tramp 1-avgustdan boshlab Janubiy Koreya va Hindistondan import qilinadigan mahsulotlarga yangi boj stavkalari joriy etilishini ma’lum qildi. Bu haqda BBC xabar berdi.
Janubiy Koreya: Avtomobil va chiplar uchun 15 foiz, metalga esa 50 foiz boj
Tramp Janubiy Koreya bilan “to‘liq va mukammal” savdo kelishuviga erishilganini aytib, ushbu mamlakatdan import qilinadigan avtomobil va yarimo‘tkazgichlarga 15 foizlik boj joriy etilishini bildirgan. Agar ikki mamlakat savdo kelishuviga erishmaganida, bu raqam 25 foizgacha ko‘tarilishi mumkin edi.
Bundan tashqari, Janubiy Koreyaning po‘lat va alyuminiy mahsulotlariga ham butun dunyo davlatlari uchun belgilangan umumiy stavka – 50 foizlik boj amal qiladi.
Kelishuv doirasida Seul AQSH iqtisodiyotiga 350 milliard dollar sarmoya kiritadi. Bu mablag‘ning 150 milliard dollari AQSHda kemasozlik, jumladan, harbiy kemalar qurilishini qo‘llab-quvvatlashga yo‘naltiriladi.
Janubiy Koreya prezidenti Li Je Myong bu bitimni “mamlakatimiz manfaatlariga mos va raqobatbardosh sharoit yaratadigan kelishuv” sifatida baholamoqda. Eng muhim yutuqlardan biri — AQSHdan keladigan guruch va mol go‘shti importini oshirmaslik bo‘yicha Janubiy Koreya istagan talablar saqlab qolinganidir.
Hindiston Rossiya bilan savdo munosabatlari sabab “jazoga tortiladi”
Tramp Hindistonga nisbatan ancha keskin choralar ko‘rishini e’lon qildi. Jumladan, 1-avgustdan boshlab ushbu davlatdan olib kiriladigan mahsulotlarga 25 foizlik boj solinadi. Bundan tashqari, Hindistonning Rossiyadan qurol-yarog‘ va neft xarid qilayotganiga javoban “alohida jazo solig‘i” ham qo‘llaniladi. Ammo, bu jazoga hali aniqlik kiritilmagan.
“Hindiston bizning do‘stimiz, biroq uning tovarlariga qo‘yiladigan boj stavkalari dunyodagi eng yuqorilaridan biri bo‘ladi”, dedi Tramp.
U Hindiston Rossiyadan harbiy texnika va energiya xarid qilishda davom etayotganini tanqid qilib, Moskvaning Ukrainadagi qon to‘kishini to‘xtatish lozimligini qo‘shimcha qilgan.
Hindiston hukumati esa bunga javoban “o‘zaro manfaatli, adolatli va muvozanatli” savdo kelishuvini tuzishga intilishini bildirgan. AQSH va Hindiston o‘rtasidagi savdo hajmi 2024-yilda 190 milliard dollarni tashkil etgan. Ammo ikki davlat o‘rtasidagi savdo kamomadi 45,8 milliard dollarga teng.
Tramp Hindistonning ayrim mahsulotlarga, jumladan, Burbon viskisi va mototsikllarga boj stavkalarini allaqachon pasaytirganini aytib, umumiy savdo muvozanatini tiklash lozimligini ta’kidlamoqda. Umuman olganda ikki davlat rahbarlari savdo hajmini 500 milliard dollarga yetkazishni maqsad qilgan.
Izoh (0)