Nepalda Everest cho‘qqisidagi axlatlarni tozalash uchun dronlardan foydalanish yo‘lga qo‘yildi. Bu haqda Bloomberg xabar bermoqda.
Ma’lum qilinishicha, Xitoyning DJI kompaniyasi ishlab chiqargan ikkita katta dron so‘nggi ko‘tarilish mavsumida ishlatilgan. Jumladan, apreldan maygacha 6000 metr balandlikda ular 280 kilogrammdan ortiq chiqindini to‘plagan.
Dunyodagi eng baland cho‘qqini tozalash bilan, odatda, mahalliy aholi - tibetliklarning avlodlari bo‘lgan sherpalar shug‘ullanadi. Ularning har biri 20 kilogrammgacha chiqindini muzliklar bo‘ylab to‘rt soatlik ko‘tarilish davomida o‘zi bilan olib boradi. Dronlar esa bu masofani atigi olti daqiqada bosib o‘tadi. Qurilmalarni keng qo‘llashga to‘sqinlik qiladigan yagona cheklov — baland tog‘ lagerlaridagi siyrak havo. Bunday joyda parvozlar imkonsiz va ob-havo beqaror bo‘ladi.
Dronlar “1-lager”dan (dengiz sathidan 6065 m balandlikda) chiqindilarni asosiy lagerga tashish uchun ishlatilgan. DJI FlyCart 30 ta yukni — arqonlar, narvonlar va boshqa jihozlarni cho‘qqiga olib chiqqandan so‘ng, sherpalar dronlarga axlat qoplarini mahkamlaydilar va ularni qaytarib olib ketadilar.
Ta’kidlanishicha, Nepal rasmiylari bilan hamkorlik qilayotgan Airlift kompaniyasi Everest va mamlakatning boshqa cho‘qqilarida qo‘shimcha dron modellarini sinovdan o‘tkazishni rejalashtirmoqda.
Qayd etilishicha, dronlar to‘planib qolgan chiqindilar tufayli “dunyodagi eng baland chiqindixona” deb ataladigan yonbag‘irlarni tozalash bo‘yicha keng ko‘lamli dasturning bir qismiga aylangan. Nepal hukumati asosiy lagerdan yuqoriga ko‘tarilgan alpinistlarga har bir kishi kamida 8 kg chiqindi olib ketish majburiyatini yukladi. Aks holda, ular 4 ming dollar garovdan mahrum bo‘ladilar.
Izoh (0)