O‘zbekistonda 2-iyuldan boshlab, o‘zini o‘zi band qilgan taksi haydovchilarining yillik daromadlari 100 million so‘mdan oshganda, ular to‘lashi lozim bo‘lgan soliqlar soliq organlarining xabarnomasi asosida yuridik shaxslar (soliq agenti) ya’ni agregatorlar tomonidan to‘lov manbaida ushlab qolinadi.
Masalan, haydovchi qaysidir kompaniya tomonidan ishlab chiqilgan tizimga ulanib, odam tashish bilan shug‘ullanmoqda. Uning daromadi yil davomida 100 mln so‘mdan oshsa, belgilangan tartibda soliq to‘lashi kerak. Soliqni to‘lash uchun hisob-kitobni to‘g‘ri qilish kerak, hisobotlarni Soliq idorasiga yuborish kerak. Mana shu ishlarni endi haydovchi qilmaydi, uning o‘rniga tizimni ishlab chiqqan va foydalanish uchun haydovchiga ochib bergan kompaniya bajaradi.
Davlat soliq qo‘mitasining ma’lum qilishicha, mazkur tartib Vazirlar Mahkamasining aprelda qabul qilingan qarorida belgilangan bo‘lib, sohada band bo‘lgan jismoniy shaxslarga soliqlarni hisoblash, to‘lash va hisobot topshirish kabi ortiqcha ovoragarchiliklardan xalos etadi.
Qayd etilishicha, 2025-yil davomida 189 ta o‘zini o‘zi band qilgan shaxslarning yillik daromadi 100 million so‘mdan oshgan.
Bugungi kunda respublikada 776,7 mingta o‘zini o‘zi band qilgan jismoniy shaxs yengil avtotransport vositasida yo‘lovchilarni tashish hamda buyurtma asosida tovarlarni yetkazib berish yo‘nalishida ro‘yxatdan o‘tib faoliyat yuritmoqda.
2025-yilning 1-iyul holatiga ko‘ra mijozlarni izlash bo‘yicha interaktiv xizmatlarni ko‘rsatuvchi 208 ta yuridik shaxslar — onlayn taksi agregatorlari soliq organlarining axborot tizimlari bilan to‘liq integratsiyalashgan. Ular orqali 430 mingdan ortiq o‘zini o‘zi band qilgan haydovchilar aholiga yo‘nalishsiz taksi xizmati ko‘rsatmoqda. Ushbu agregatorlar tomonidan davlatga 89,6 milliard so‘m soliq to‘langan.
2025-yilning fevralda qabul qilingan prezident qarori bilan yengil avtomobillarda yo‘lovchilarni shahar, shahar atrofi va shaharlararo tashish o‘zini o‘zi band qilgan fuqarolar shug‘ullanishi mumkin bo‘lgan faoliyat turlari ro‘yxatiga kiritildi. Ularning 100 million so‘mgacha daromadlariga soliq hisoblanmaydi. Yil tugashi bilan yangi yil boshidan daromadlar qaytadan hisoblanadi.
Izoh (0)