Isroil muzokaralar muvaffaqiyatsizlikka uchragan taqdirda G‘azo sektorini “bosib olish” bo‘yicha yangi reja tayyorladi. Bu haqda Isroil televideniyesining 12-kanali xabar berdi.
Isroil armiyasi shtabi boshlig‘i Eyal Zamir siyosiy rahbariyatga yangi harakatlar rejasini taqdim etgan. U o‘t ochishni to‘xtatish bo‘yicha muzokaralar amalga oshmasa, kuchga kiradi. Yahudiy rasmiylari rejani ijobiy qabul qilgan. Manbalarga ko‘ra, u “G‘azoni egallash rejasi” deb ataladi va Rafahdagi “gumanitar shahar”ga (lagerga) muqobil hisoblanadi.
Mazkur lager qurilishiga Isroil sobiq bosh vaziri Exud Olmert qarshi chiqqan. Sababi uning qurilishi falastinliklarni “etnik tozalash” hisoblanishini bildirgan. Lagerga majburiy ko‘chiriladigan 600 nafar falastinlikka tashqariga chiqishga ruxsat berilmaydi.
Yangi reja G‘azo sektorining yanada katta qismini egallash va ushlab turishni o‘z ichiga oladi. Isroil armiyasining fikricha, bu urushning ikkita asosiy maqsadiga: garovga olinganlarni ozod qilish va HAMASni mag‘lub etishga erishish imkonini beradi.
Urush maqsadlariga zid bo‘lgan gumanitar shahar bilan kurashish o‘rniga, biz ushbu maqsadlarga erishishga yordam beradigan reja bilan jiddiy shug‘ullanishimiz kerak, degan Isroil rasmiylari.
Isroil rahbariyatining ko‘pchiligi Netanyaxudan uni amalga oshirishni so‘ramoqda. Biroq bosh vazirning atrofidagilar u yaqin kelajakda HAMAS bilan kelishuvga erishishga qat’iy qaror qilganini ta’kidlamoqda.
Izoh (0)