Namanganda fuqarodan 30 ming dollar pora talab qilgan Qurilish va uy-joy kommunal xo‘jaligi hududiy nazorat qilish inspeksiyasi bosh mutaxassisi ushlandi. Bu haqda DXX matbuot xizmati xabar berdi.
U 2025-yil yanvarida 8 yilga ozodlikdan mahrum qilingan mahkumning ishini sud tizimidagi tanishlari orqali sudda qayta ko‘rib chiqish va ozodlikdan mahrum qilish bilan bog‘liq bo‘lmagan jazoni tayinlashni va’da qilgan. DXXning Namangan viloyati bo‘yicha boshqarmasi xodimlari tomonidan viloyat Iqtisodiy jinoyatlarga qarshi kurashish departamenti xodimlarini jalb qilgan holda o‘tkazilgan tezkor tadbirda bosh mutaxassis oldindan 10 ming dollarni olgan vaqtida ushlangan.
Mazkur mutaxassis firibgarlik bilan bog‘liq jinoyati uchun muqaddam bir necha marotaba sudlangan.
Namangan viloyatida o‘tkazilgan yana bir tezkor tadbirda, mol-mulklarni baholash faoliyati bilan shug‘ullanuvchi MCHJ rahbari soliq organlaridagi mansabdor tanishlari orqali tadbirkorga tegishli bo‘lgan MCHJning 783 mln so‘mlik soliq qarzdorligini 141 mln so‘mgacha kamaytirib berish evaziga 4400 dollar olgan vaqtida jinoyat ustida ushlangan. Shuningdek, tezkor tadbir davom ettirilib, mansabdor tanishi hisoblangan Namangan viloyati soliq boshqarmasi sho‘ba boshlig‘i ham 4400 dollarni pora sifatida olgan vaqtida qo‘lga tushgan.
Toshkent shahrida qayd etilgan holatda, Mirobod tuman hokimligi Ijtimoiy moslashtirish markazi rahbari o‘z xizmat mavqeyidan foydalanib, fuqaroligi bo‘lmagan shaxsga fuqarolik pasportini rasmiylashtirish hamda doimiy ro‘yxatga qo‘ydirib berish evaziga 1200 dollar olgan vaqtida ushlangan.
Qashqadaryo viloyatida kuzatilgan qonunbuzilish holatida, Bosh prokuratura huzuridagi Majburiy ijro byurosi Qarshi shahar bo‘limi davlat ijrochisi o‘z ish yurituvida bo‘lgan, javobgar fuqaroning qariyb 70 mln so‘mlik qarzdorligini undirish uchun uning avtotransport vositasiga qo‘yilgan taqiqni yechib berish evaziga 1000 dollar talab qilgan. U talab qilingan pulni Qarshi tumanidagi fermer xo‘jalik rahbari vositachiligida pora sifatida olgan vaqtida ushlangan.
Hozirda ushbu shaxslarga nisbatan jinoyat ishi qo‘zg‘atilib, tergov harakatlari olib borilmoqda.
Namanganda bir necha bor pora olgan bojxona inspektori ham qo‘lga tushgandi. U pullarni qarindoshiga tegishli bank plastik kartalariga o‘tkazib olgan. Andijon va Surxondaryoda Soliq boshqarmalari bosh inspektorlari pora talab qilgani uchun qamoqqa olingandi.
Izoh (0)