AQSHning Merilend shtatida o‘zi sodir etmagan ikkita qotillik uchun 32 yil qamoqda o‘tirgan Jon Hafington oqlandi. Bu haqda Associated Press xabar berdi.
Erkak uni nohaq hibsga olganlar ustidan sudga murojaat qilmoqchi. Biroq javobgar sifatida ko‘rsatilgan besh kishidan to‘rttasi allaqachon vafot etgan. Haffington 1981-yilda Merilend shtatida sodir etilgan ikkita qotillikda ayblanib hibsga olingandi.
U 2023-yil yanvar oyida shtat gubernatori Larri Hogan tomonidan to‘liq oqlov asosida afv etilgan. Keyinchalik, hukumat uni noqonuniy qamoqda saqlaganlik uchun 2,9 million dollar kompensatsiya to‘lashga qaror qilgan.
Qamoqda o‘tkazgan yillarim insonlar bilan aloqamni buzdi, oila qurish imkoniyatidan mahrum qildi. Onam vafot etganida yonida bo‘lolmadim. Ozodlikka chiqqanimda esa 90 yoshdan oshgan, Altsgeymer kasalligidan aziyat chekayotgan otam bilan o‘tkazishim mumkin bo‘lgan qimmatli vaqtni yo‘qotdim, degan Haffington.
62 yoshli Haffington doimo o‘zining aybsizligini ta’kidlab kelgan. U ikki marta umrbod qamoq jazosiga hukm qilingan va 32 yilini qamoqda o‘tkazgan.
U “Xotira kuni qotilliklari” nomi bilan tanilgan ishda ikki bor sudlangan. Jabrlanuvchi Diana Bekker mashinasida pichoqlab o‘ldirilgan, biroq ichkarida bo‘lgan 4 yoshli o‘g‘li omon qolgan. Bekkerning sevgilisi Jozef Xadson otib o‘ldirilgan va jasadi bir necha kilometr uzoqlikda topilgan.
Keyinchalik boshqa gumonlanuvchi Haffingtonga qarshi guvohlik bergan. Uning o‘zi ham birinchi darajali qotillikda aybdor deb topilib, 27 yil qamoq jazosini o‘tagan. Prokurorlar jinoyat joyida topilgan sochlar Haffingtonga tegishli ekani haqidagi keyinchalik soxta ekani aniqlangan dalillarga tayangan.
Haffington ilk bor 1981-yilda apellyatsiyaga murojaat qilgan. 1983-yilda u birinchi darajali qotillikda aybdor deb topilib, o‘lim jazosiga hukm etilgan. Biroq keyinchalik bu hukm ikki umrbod qamoq jazosiga almashtirilgan.
Izoh (0)