Xitoyning Air China milliy aviatashuvchisi xalqaro miqyosdagi ishtirokini kengaytirib, Pekin—Toshkent—Pekin yo‘nalishi bo‘yicha muntazam reyslari yo‘lga qo‘ydi. Bu haqda Uzbekistan Airports xabar berdi.
Ta’kidlanishicha, aviakompaniya ushbu muntazam reyslarni ochish orqali ilk bor O‘zbekiston bozoriga kirmoqda.
Ma’lum qilinishicha, 19-iyul kuni soat 19:40 da Toshkent xalqaro aeroportiga aviakompaniyaning birinchi reysi kelib qo‘ngan. Zamonaviy Boeing-737 laynerida yetib kelgan ekipaj va yo‘lovchilar an’anaviy suv arkasi va gullar bilan kutib olingan.
“Biz Xitoy va O‘zbekiston poytaxtlari o‘rtasida to‘g‘ridan-to‘g‘ri reyslarni yo‘lga qo‘yishdan mamnunmiz. Ishonchimiz komilki, bu yo‘nalish savdo, sayyohlik va madaniy aloqalarni rivojlantirishda muhim bo‘g‘inga aylanadi.
Air China nafaqat yo‘lovchilarni tashish, balki odamlarni, shaharlarni va imkoniyatlarni bog‘lovchi yangi ufqlarni ochishga intiladi. Biz aviakompaniya parvozlarning har bir bosqichida ishonchlilik, qulaylik va yuqori xizmat ko‘rsatishga eʼtibor qaratamiz”, deya ta'kidladi kompaniya vakili.
Qayd etilishicha, parvozlar haftasiga uch marta: seshanba, payshanba va shanba kunlari amalga oshiriladi.
Air China — Xitoyning eng yirik va asosiy aviatashuvchisi. Star Alliance aʼzosi hisoblanadigan kompaniya 1988-yilda tashkil etilgan va Pekin aeroportida joylashgan.
Bundan avval 2026-yil mart oyidan boshlab Etihad Airways aviakompaniyasi Abu-Dabidan Toshkentga hamda Markaziy Osiyo va Kavkazorti shaharlariga parvozlarni yo‘lga qo‘yishi xabar qilingandi.
Izoh (0)