Germaniya AQSH bojxona to‘lovlari tufayli yiliga 30 mlrd yevrodan ko‘proq zarar ko‘rishi mumkin

Germaniyaning AQSH bojxona to‘lovlaridan ko‘radigan zarari yiliga 31 milliard yevrogacha yetishi mumkin. Yevropaning yetakchi iqtisodiyoti uchun bunday xavflarni Deloitte maslahat kompaniyasi bashorat qilmoqda.

Mutaxassislarning ta’kidlashicha, o‘rta muddatli istiqbolda Germaniyadan AQSHga tovar eksporti 20 foizga kamayadi, biroq bu yo‘qotishlarni boshqa bozorlarga, masalan, Yevropa Ittifoqining boshqa mamlakatlariga, Indoneziya yoki Janubiy Koreyaga yetkazib berishni qayta yo‘naltirish orqali qoplash mumkin. Shunda yo‘qotishlarni 7,1 milliard yevrogacha kamaytirish imkoni tug‘iladi.

Bundan Germaniya mashinasozligi eng ko‘p zarar ko‘radi. Uning savdo tariflari tufayli yo‘qotishlari taxminan 7,2 milliard yevroni tashkil etadi. Germaniya farmatsevtika kompaniyalari 5,1 milliard yevro yo‘qotadi. Bundan tashqari, Germaniyaning kimyo, avtomobilsozlik va elektrotexnika sanoati ham zarar ko‘rishi kutilmoqda.

Yevropa Ittifoqi va AQSH o‘rtasidagi kelishuv doirasida Yevropa tovarlariga tariflar 15 foizni tashkil etadi, Amerika tovarlari uchun esa ular nolga teng bo‘ladi. Shuningdek, Yevrokomissiya Ittifoq 750 milliard dollarlik energiya tashuvchilarni sotib olishini va Amerika iqtisodiyotiga taxminan 600 milliard dollar sarmoya kiritishini va’da qilgan.

Germaniya po‘lat ishlab chiqaruvchilar uyushmasi (Wirtschaftsvereinigung Stahl) tomonlar savdo mojarosining yanada kuchayishidan qochishga erishganliklarini, ammo buning o‘zi yetarli emasligini va kelishuv Yevropa po‘lat sanoatidagi og‘ir vaziyatni o‘zgartirishga qodir emasligini ta’kidlagan. Germaniya kansleri Fridrix Mers tariflarning hozirgi 15 foizlik darajasi kelishuv natijasida erishish mumkin bo‘lgan eng yaxshi natija ekanligini bildirgan.

12-iyul kuni Tramp AQSH 1-avgustdan boshlab Yevropa Ittifoqidan keltirilayotgan mahsulotlarga 30 foizlik boj soliqlarini joriy etishini, shu bilan birga ilgari kiritilgan sohaviy tariflar o‘z kuchida qolishini ma’lum qilgan edi. Uning Yevropa Komissiyasi rahbariga yo‘llagan maktubida ta’kidlanishicha, agar YI Amerika mahsulotlariga o‘z tariflarini oshirmoqchi bo‘lsa, AQSH o‘zining 30 foizlik boj soliqlariga “ushbu miqdorni” qo‘shib qo‘yadi.