AQSH astronavtlarni Donald Trampning prezidentlik muddati tugashidan oldin, ya’ni uch yarim yil ichida Oyga qo‘ndirishni mo‘ljallamoqda. Bu haqda transport vaziri, NASA direktori vazifasini vaqtincha bajaruvchi Shon Daffi ma’lum qildi.
“Kelasi yil biz Oyga qaytamiz, ammo qo‘nmaymiz, balki Oyni aylanib o‘tamiz. Keyin taxminan bir yildan so‘ng yana Oyga qo‘namiz. Bu Donald Tramp davlat rahbari lavozimini egallab turgan paytda sodir bo‘ladi. Shundan so‘ng baza quramiz, Oyda qolamiz va u yerda olgan bilimlarimiz Marsga yetib borishimizga yordam beradi”, dedi u Fox News telekanaliga bergan intervyusida.
2019-yilning bahorida NASA uch bosqichli Artemis Oy dasturi loyihasini e’lon qildi. Birinchi bosqich (Artemis I) Orion kemasining Oy atrofida uchuvchisiz parvozini va uning Yerga qaytishini o‘z ichiga olgan. Parvoz 2022-yil 16-noyabrdan 11-dekabrgacha amalga oshirildi. Ikkinchi bosqich (Artemis II) - kemaning ekipaj bilan Yerning tabiiy yo‘ldoshi atrofida aylanib o‘tishi. Uchinchi bosqichda (Artemis III) NASA astronavtlarni Oyga qo‘ndirishni va keyinchalik Marsga yuborishni rejalashtirmoqda.
Dastlab Artemis II va Artemis III mos ravishda 2022 va 2024-yillarga mo‘ljallangan edi, biroq bu muddatlar bir necha bor kechiktirildi. O‘tgan yilning dekabr oyida NASA ularni 2026-yil aprel va 2027-yil o‘rtalariga ko‘chirdi.
Bundan avval AQSH Aeronavtika va kosmik tadqiqotlar milliy boshqarmasi (NASA) rahbariyati xodimlar soni 3 870 kishiga kamayib, taxminan, 14 ming kishiga tushishi kutilayotgani ma`lum qilingandi.
Izoh (0)