Markaziy bank boshqaruvi qarori bilan mikromoliya tashkilotlarining islomiy moliyalashtirishga oid xizmatlarni ko‘rsatish tartibi to‘g‘risidagi nizom tasdiqlandi.
Mikromoliya tashkilotlari ushbu nizom talablari asosida mijozlarga islomiy moliya bilan bog‘liq quyidagi xizmatlarni ko‘rsatishi mumkin:
- islomiy ijara;
- muzoraba — foydani taqsimlashga asoslangan moliyalashtirish;
- murobaha — nasiya savdoga asoslangan moliyalashtirish;
- mushoraka — sherikchilik, ya’ni foyda va zararlarni taqsimlashga asoslangan moliyalashtirish;
- salam — oldindan to‘lovga asoslangan moliyalashtirish.
Islomiy moliyalashtirishga oid ushbu xizmatlar ko‘rsatilishi uchun maxsus kengash tashkil etilishi lozim. Mikromoliya tashkiloti ishtirokchilari (aksiyadorlarining) umumiy yig‘ilishi qaroriga muvofiq sohaga ixtisoslashgan uyushmalar yoki birlashmalar huzurida tashkil etilgan va ushbu nizom bilan o‘rnatilgan talablarga mos keluvchi tarkibdan iborat maxsus kengashni shartnoma (autsorsing) asosida jalb qilishi mumkin.
Maxsus kengash a’zolarining kamida bir nafari islom huquqi sohasida oliy ma’lumotga, bir nafari oliy yuridik ma’lumotga, qolgan a’zolari esa islomiy moliyalashtirishga oid xalqaro sertifikatga ega bo‘lishi lozim.
Bunda mikromoliya tashkiloti jalb qilingan maxsus kengash faoliyati bilan bog‘liq tavakkalchiliklarni boshqarish uchun javobgar bo‘ladi.
Taqiqlangan va maxsus kengash ko‘rsatmalariga zid bo‘lgan tovarlar savdosi bilan shug‘ullanish hamda faoliyat turlarini moliyalashtirish taqiqlanadi. Xususan, chet el valyutasi, kriptoaktivlar, oltin va kumushlarni sotib olish uchun pul berish mumkin emas.
Mikromoliya tashkiloti islomiy moliyalashtirishga oid xizmatlarni ko‘rsatishda mizojlariga islomiy moliyalashtirishga oid xizmatlarning o‘ziga xos xususiyatlari va ular bilan bog‘liq tavakkalchiliklar haqida tushuntirish berishi shart.
Izoh (0)