2026-yilgi Jahon chempionati saralash doirasida Argentina va Kolumbiya terma jamoalari o‘zaro to‘qnash keldi. Bahs 1:1 hisobidagi durang bilan yakunlangan bo‘lsa-da, maydonda futbolchilar o‘rtasida keskin holatlar ham yuz berdi.
Uchrashuv davomida Lionel Messi va Xames Rodriges o‘rtasida og‘zaki tortishuv yuzaga keldi. Argentinalik jurnalistlar, xususan, TyC Sports teleradiokompaniyasi ushbu ziddiyatdan ayrim so‘zlarni aniqlay olishdi.
Messi Xamesga shunday murojaat qilgan:
Sen finalda bizga yordam berishganini aytgan eding. Juda ko‘p gapiryapsan.
Xames esa buni inkor qilgan:
Men hech narsa demaganman.
To‘liq suhbatni aniqlash qiyin bo‘ldi, chunki tortishuv davomida ikki futbolchi ham og‘zini qo‘llari bilan berkitgan. Biroq TyC Sports versiyasiga ko‘ra, Messining e’tirozlari Xamesning 2024-yilgi Amerika Kubogi finalidan keyingi bayonotlariga qaratilgan bo‘lishi mumkin.
Eslatib o‘tamiz, o‘sha finalda Kolumbiya Argentina terma jamoasiga mag‘lub bo‘lgan edi. Bellashuvdan keyin Xames hakamlik va boshqa tashqi omillarni tanqid qilib, “natijaga tashqi kuchlar ta’sir ko‘rsatdi”, degan fikr bildirgandi.
Izoh (0)