Eronning mashhur klublari o‘zbekistonlik futbolchilar bilan muzokaralarni davom ettirmoqda. Persepolislion nashri xabariga ko‘ra, Tehronning “Persepolis” klubi “Paxtakor” himoyachisi Hojiakbar Alijonov bilan shaxsiy shartnoma borasida kelishuvga erishgan.
Ayni paytda “Persepolis” va “Paxtakor” klublari transfer shartlari yuzasidan muzokara olib bormoqda. Agar tomonlar yakuniy kelishuvga erisha olsa, Alijonov yaqin kunlarda Eron poytaxti jamoasiga yo‘l oladi.
Bundan tashqari, “Persepolis” “Bunyodkor” yarim himoyachisi Odil Hamrobekovga ham rasmiy taklif bildirgan. Klub futbolchini sotib olish uchun 150 mingdan 200 ming dollargacha to‘lashga tayyor edi. Biroq tomonlar shaxsiy shartlar bo‘yicha kelishuvga erisha olmagan. Hamrobekov ayni paytda boshqa chet el jamoalari variantlarini ko‘rib chiqmoqda. Shuningdek, Qarshining “Nasaf” klubi ham Elit Osiyo Chempionlar Ligasi oldidan Hamrobekovni o‘z safiga qo‘shib olishdan manfaatdor.
Shu bilan birga, Tehronning boshqa klubi – “Istiqlol” ham o‘zbekistonlik hujumchi bilan shartnoma imzolashi mumkin. Eronning Total Futbol nashri xabariga ko‘ra, jamoa bosh murabbiyi Rikardu Sapinto ikki nafar yangi hujumchi olib kelmoqchi. Ulardan biri – “Paxtakor” hujumchisi Igor Sergeyev. 32 yoshli futbolchi joriy mavsum Superligada doiasidagi 15 o‘yinda maydonga tushib, 11 ta gol muallifiga aylangan. Uning transfer narxi 1 million yevroga baholangan.
Agar Sergeyev “Istiqlol”ga yo‘l olsa, ushbu jamoa safidagi uchinchi o‘zbekistonlik futbolchi hisoblanadi. Bunga qadar tehronliklar safida Jaloliddin Masharipov to‘p surayotgan edi. Shuningdek, yaqinda ular Qozonning “Rubin” klubidan Rustam Ashurmatovni 450 ming yevro evaziga xarid qildi.
Izoh (0)