Sakkiz karra “Oltin to‘p” sohibi, argentinalik hujumchi Lionel Messi hamda uning Inter Mayami”dagi jamoadoshi Luis Suares o‘zlarining shaxsiy futbol klubini tashkil etdi. Bu haqda ESPN nashri xabar berdi.
Yangi jamoa “Deportivo LSM” deb nomlandi va Urugvay futbolining to‘rtinchi divizionidan ishtirokini boshlaydi. “LSM” qisqartmasi ikki futbolchi ismlarining bosh harflaridan tashkil topgan, ya’ni Luis Suares hamda Lionel Messi ismlarining qisqartirma shakli hisoblanadi.
Meni sherik sifatida tanlaganingdan juda xursandman. Umid qilamanki, bu loyihani rivojlantirishda bor kuchim bilan yordam beraman, eng asosiysi — sen bilan uzoq vaqt yana birgamiz, dedi Messi.
Messining bu loyihadagi roli hozircha aniq emas, biroq mahalliy OAV xabariga ko‘ra, u klubda sherik sifatida faoliyat yuritadi. Shuningdek, Urugvay terma jamoasi va “Inter” (Milan) sobiq futbolchisi Alvaro Rekoba yangi jamoa bosh murabbiyi bo‘lishi kutilmoqda.
Klub e’lon qilinishi bilan uning Instagram sahifasi ham ochildi va oradan atigi ikki soat o‘tib, sahifada 40 mingdan ortiq obunachi to‘plandi.
“Deportivo LSM”ning o‘quv-mashg‘ulot bazasi urugvaylik hujumchiga tegishli sport majmuasi hududida joylashadi. Bu yerda 1400 tomoshabinga mo‘ljallangan sun’iy qoplamali stadion va 620 o‘rinli mini-futbol maydoni mavjud.
Eslatib o‘tamiz, Messi 2023-yildan beri “Inter Mayami” safida to‘p suradi, Suares esa 2024-yilda bu klubga qo‘shilgan.
Izoh (0)