Ixtisoslashtirilgan taʼlim muassasalari agentligi tizimida bugungi kunda 14 ta Prezident maktabi, 9 ta ijod maktabi hamda 182 ta ixtisoslashtirilgan maktablar faoliyat ko‘rsatib kelmoqda. Bu haqda agentlik matbuot xizmati “Daryo”ga maʼlum qildi.
Qayd etilishicha, 2024-yili hududlarda yana 3 ta ixtisoslashtirilgan maktab hamda 3 ta tayanch ixtisoslashtirilgan maktabi yangi ochildi.
Ixtisoslashtirilgan taʼlim muassasalari agentligi tizimidagi maktablarga 2024/2025-o‘quv yili uchun hujjatlar qabuli 1-iyundan – 20-iyunga qadar faqat onlayn shaklda ariza.piima.uz sayti orqali amalga oshirildi.
Prezident, ijod hamda ixtisoslashtirilgan maktablarga kirish imtihonlari katta sig‘imli 56 ta yopiq binolarda o‘tkazilishi belgilangan.
2024/2025-o‘quv yili uchun agentlik tizimidagi maktablarga jami 244 ming 378 ta ariza kelib tushgan. Shundan:
- Prezident maktablariga 62 062 ta;
- Ijod maktablariga 5 512 ta;
- Tayanch ixtisoslashtirilgan maktablarga 42 785 ta;
- Ixtisoslashtirilgan maktablarga 134 019 ta.
Prezident maktablariga qabul qilingan hujjatlar bo‘yicha bitta o‘ringa o‘rtacha 185 ta hujjat to‘g‘ri kelmoqda.
Bunda, bir o‘ringa qabul qilingan hujjatlar bo‘yicha eng yuqori ko‘rsatkich Farg‘ona viloyatiga 293 ta, Andijon viloyatiga 285 ta, Samarqand viloyatiga 249 ta, Namangan viloyatiga 225 ta hamda eng past ko‘rsatkich Sirdaryo viloyati 99 ta hamda Navoiy viloyati 81 ta hujjat to‘g‘ri keldi.
Maʼlumot uchun, 14 ta Prezident maktabining 5-sinfiga 336 nafar (har bir maktabga 24 nafardan) o‘quvchi qabul qilinadi.
Ijod maktablariga qabul qilingan hujjatlar bo‘yicha bir o‘ringa qabul qilingan hujjatlar bo‘yicha eng yuqori ko‘rsatkich Namangan viloyatidagi Isʼhoqxon Ibrat nomidagi ijod maktabiga 35 ta, Farg‘ona viloyatidagi Erkin Vohidov hamda Jizzax viloyatidagi Hamid Olimjon va Zulfiya nomidagi ijod maktablariga 16 tadan eng past ko‘rsatkich esa Toshkent shahridagi Abdulla Qodiriy nomidagi ijod maktabiga 5 ta hujjat to‘g‘ri keldi.
Maʼlumot uchun, 9 ta ijod maktabining 7-sinfiga 400 nafar (har bir maktabga 40/60 nafardan) o‘quvchi qabul qilinadi.
Hududiy ixtisoslashtirilgan maktablarga qabul qilingan hujjatlar bo‘yicha eng yuqori ko‘rsatkich Farg‘ona viloyatiga 17 815 ta, Samarqand viloyatiga 13 125 ta, Andijon viloyatiga 12 904 ta hamda eng past ko‘rsatkich Navoiy viloyatiga 2 987 ta, Toshkent shahriga 3 626 ta, Sirdaryo viloyati 5 645 ta hujjat qabul qilingan.
Tayanch ixtisoslashtirilgan maktablariga jami 42 785 ta hujjat kelib tushgan bo‘lib shundan, Abu Ali ibn Sino nomidagi ixtisoslashtirilgan maktabiga 3 083 ta, Mirzo Ulug‘bek nomidagi ixtisoslashtirilgan maktabiga 2 556 ta, Muhammad al-Xorazmiy nomidagi ixtisoslashtirilgan maktabi va filiallariga jami 37 146 ta hujjat kelib tushgan bo‘lib, jumladan Toshkent shahridagi Muhammad al-Xorazmiy nomidagi ixtisoslashtirilgan maktabiga 17 502 ta, mazkur maktabning Nukus filialiga 3 686 ta, Andijon filialiga 8 651 ta hamda Samarqand filialiga 7 307 ta hujjat qabul qilingan.
Maʼlumot uchun, 179 ta ixtisoslashtirilgan maktabning 5-sinfiga 5 520 nafar, 7-sinfiga 2 208 nafar, shu jumladan: Abu Ali ibn Sino nomidagi ixtisoslashtirilgan maktabiga 120 nafar, Mirzo Ulug‘bek nomidagi ixtisoslashtirilgan maktabiga 40 nafar, Muhammad al-Xorazmiy nomidagi ixtisoslashtirilgan maktabiga 120 nafar o‘quvchi qabul qilinadi.
Izoh (0)