Qirg‘iziston bilan chegaradagi “Do‘stlik” nazorat-o‘tkazish punktida iyul oyidan elektron navbat tizimi joriy etiladi. Bu haqda Qirg‘iziston Bojxona xizmati raisi Almaz Saliyev ma’lum qildi.
Saliyevning ta’kidlashicha, mazkur nazorat-o‘tkazish punkti eng gavjumlaridan biri hisoblanadi. U O‘sh viloyatida, Qirg‘iziston va O‘zbekiston chegarasida joylashgan.
Biz inson omilini istisno qilishga, yuk va transport harakatini tartibga solishga, kutish vaqtini kamaytirishga va tirbandliklarni bartaraf etishga harakat qilmoqdamiz, dedi bojxona xizmati rahbari.
Endi chegarani kesib o‘tish uchun haydovchilarga mobil telefon orqali elektron navbatga turish va o‘ziga qulay vaqtni tanlash kifoya. Bunday tizim dastlab Qizil-Qiyadagi nazorat-o‘tkazish punktida sinov tariqasida joriy etilgan. Loyiha yaxshi natijalarni ko‘rsatgan, nazorat-o‘tkazish punktining o‘tkazish qobiliyati bir necha barobar oshgan. Almaz Saliyev keyinchalik mazkur loyiha barcha nazorat-o‘tkazish punktlarida kengaytirilishini ta’kidlamoqda. Hozirda qirg‘iz-qozoq chegarasida elektron navbatni joriy etish masalasi ishlab chiqilmoqda.
18-iyundan boshlab Qirg‘iziston-O‘zbekiston davlat chegarasi uchastkasidagi uchta avtomobil o‘tkazish punkti — “Qadamjoy-avtodorojniy”, “Chechme-avtodorojniy” va “Oq-Qiya-avtodorojniy” kunu tun ishlashni boshlagandi. Bunday qaror Qirg‘iziston va O‘zbekiston chegara idoralari rahbarlarining muzokaralari yakunlari bo‘yicha qabul qilingan.
Maqsad — ayniqsa, turistik mavsum davrida chegarani kesib o‘tayotgan fuqarolar uchun yanada qulay sharoitlar yaratish. Endi O‘zbekiston fuqarolari istalgan vaqtda Shohimardon anklavi va Qurbon ko‘l, Dugoba va Gauvyan daralari kabi go‘zal joylarga tashrif buyurishi mumkin bo‘ladi. Nazorat-o‘tkazish punktlaridan faqat Qirg‘iziston va O‘zbekiston fuqarolari o‘tishi mumkin. 24 soatlik ish rejimi 2025-yil 1-oktyabrgacha davom etadi, deyiladi Qirg‘iziston Chegara xizmati xabarida.
Izoh (0)