Finlyandiyada dunyodagi eng katta qum batareyasi ishga tushdi. U uglerod chiqindilarini yiliga taxminan 160 tonnaga kamaytirishi kutilmoqda. Bu haqda IFL Science xabar berdi.
Balandligi 13 metr va kengligi 15 metr bo‘lgan qum batareyasi Finlyandiyaning janubida joylashgan Pornainen munitsipalitetida qurilgan. Yangi tizim 1 megavatt issiqlik energiyasini yetkazib berish va 100 megavatt soatgacha energiyani saqlashga qodir. Bundan tashqari u issiqlik chiqindilarini deyarli 70 foizga kamaytiradi.
Qum batareyasi nima?
Qum batareyasi sig‘imi katta bo‘lib, u taxminan 2000 tonna maydalangan sovun toshi bilan to‘ldirilgan bo‘ladi. Sovun toshi steatit deb ham ataladi va issiqlikni yutish qobiliyati bilan mashhur bo‘lgan metamorfik jins hisoblanadi.
Issiqlik energiyasi quvurlar tizimi bo‘ylab tosh material orqali haydaladi. U quvurda soatlar, kunlar, hatto haftalar davomida ushlab turiladi. Energiya qaynoq suv va bug‘ ko‘rinishida chiqariladi. Ulardan sanoatda yoki suvli isitish tizimlarida foydalanish mumkin bo‘ladi.
Qumli batareyalarning foydasi nima?
Qum batareyasi ortiqcha yashil energiyani saqlanadigan issiqlikka aylantirib, qayta tiklanadigan energiya manbalaridan maksimal darajada foydalanishga yordam beradi. Dunyo tobora ko‘proq quyosh va shamol kabi toza energiya manbalariga intilmoqda. Ammo ularning asosiy kamchiligi shundaki, ular faqat quyosh porlaganida yoki shamol esganida energiya ishlab chiqaradi. Qum batareyasi esa bu muammoni hal qiladi.
“Bizning maqsadimiz 2035-yilga borib iqlimga nisbatan salbiy ta’sirni kamaytirish. Qum batareyasi bunga erishishdagi katta qadamdir”, dedi kompaniya bosh direktori Mikko Paajanen.
Qum batareyalari elektr energiyasi kompaniyalariga raqobatbardosh ustunlik berib, elektr tarmoqlarini barqaror saqlashga yordam beradi. Uning katta saqlash hajmi elektr tarmog‘iga talab past bo‘lganda ortiqcha energiyani saqlash, so‘ngra talab keskin oshganda undan foydalanish imkonini beradi.
Izoh (0)