Ukrainaning Rossiya harbiy aerodromlaridagi samolyotlarga qarshi olib borgan “O‘rgimchak to‘ri” operatsiyasi kelajakdagi barcha urushlarning kechishini o‘zgartirishi mumkin. Bu haqda Axios xabar berdi.
Xabarga ko‘ra, Ukraina Xavfsizlik xizmati tomonidan o‘tkazilgan “O‘rgimchak to‘ri” kod nomli operatsiya Kreml rahbari Putin uchun og‘ir zarba bo‘ldi. Hukumatparast blogerlar bu hujumni Perl-Harbor bilan taqqoslamoqda, harbiy ekspertlar esa uni Rossiyaning milliy mudofaasi uchun “yangi dahshat” deb atamoqda:
Bunga qo‘shilish mumkin: Ukrainaning arzon dronlardan mohirona foydalanishi nafaqat bu urushning kelajagi, balki barcha urushlarning kelajagi uchun ulkan oqibatlarga olib keladi, deyiladi tahlilda.
Rossiya frontda sulh tuzishdan bosh tortayotgan, AQSH yangi sanksiyalar joriy etilishini rad etayotgan, G‘arb hamkorlari esa Ukraina armiyasiga yangi havo hujumidan mudofaa vositalarini topshirishga shoshilmayotgan bir paytda Kiyev oddiy xulosaga keldi: agar xalqaro hamjamiyat Rossiya bombardimonchi samolyotlarini havoda tutib olishda yordam bermasa, ularni yerda yo‘q qilishga to‘g‘ri keladi.
Rossiya strategik aviatsiyasiga dronlar hujumi AQSH portlaridagi Xitoy konteynerlari orqali maxfiy hujumlar tahdidini muhokama qilishga majburlaydi, deyiladi xabarda.
AQSH Mudofaa vazirligi 2024-yilda Xitoyda oddiy yuk konteyneriga joylashtirish mumkin bo‘lgan dronlar ehtimoli haqida ogohlantirgan edi. Hozir esa Ukraina real vaqtda aynan shunday ssenariyni amalga oshirdi. Bu holatni AQSH Mudofaa vazirligi faqat qog‘ozdagi modellashtirish orqali tasavvur qilgan edi.
Perl-Harbor — AQSHning Gavayi orollaridagi harbiy-dengiz bazasining nomi. 1941-yil 7-dekabr kuni Yaponiyaning kutilmagan hujumi bilan mashhur bo‘lgan.
“O‘rgimchak to‘ri” operatsiyasi
Ukraina Xavfsizlik xizmati 1-iyun kuni Rossiyaning beshta aviatsiya bazalariga qarshi keng ko‘lamli maxsus operatsiya o‘tkazdi. Uning maqsadi Rossiya strategik aviatsiyasini, xususan, Ukraina shaharlariga muntazam ravishda hujum qilgan qanotli raketa tashuvchilarini ishdan chiqarish edi.
Operatsiya bir yarim yildan ko‘proq vaqt davomida tayyorlangan va puxta rejalashtirilgan. Hujumlar Rossiyada to‘xtab turgan yuk mashinalaridan uchib chiqqan dronlar yordamida amalga oshirilgan. Bu esa Ukraina chegarasidan uzoq masofada zarbalar berishga imkon bergan.
G‘arb ekspertlari fikricha, bu operatsiya urushda burilish nuqtasi bo‘lishi mumkin va Ukrainaning Rossiyaning strategik obyektlariga zarba berish qobiliyatini namoyish etadi. Operatsiyaga 117 ta dron jalb qilingan. Ular Rossiyaning strategik qanotli raketa tashuvchilarining 34 foizini yo‘q qilgan.
Zelenskiy operatsiyaning “ofisi” Rossiya viloyatlaridan birida Federal xavfsizlik xizmati boshqarmasi yonida joylashganini aytgan. Ukraina prezidenti “noyob operatsiya” uchun xavfsizlik xizmati xodimlariga minnatdorlik bildirgan.
Izoh (0)