Bu yilgi haj mavsumida ilk bor Falcon nomli o‘t o‘chiruvchi va qutqaruvchi dron ishga tushiriladi. Bu haqda Saudiya Arabistoni fuqarolik mudofaasiga tayanib, Arab News xabar berdi.
Sun’iy intellekt bilan jihozlangan dron baland tog‘larda yoki chekkaroq hududlarda yong‘inlarni o‘chirish va qutqaruv ishlarini olib borishga mo‘ljallangan. U yuqori balandliklarda 12 soatgacha parvoz qilib, taxminan 40 kilogrammgacha yuk ko‘tarishi mumkin.
Dron hodisa joyidan jonli efirga uzatish imkoniyatini ham beradi. Uning asosiy afzalliklari tezkor javob berish, xodimlar uchun xavfni kamaytirish va real vaqt rejimida tasvirga olish orqali qaror qabul qilish imkoniyatlaridan iborat.
Saudiya Arabistoniga 2025-yilgi haj mavsumi uchun xorijdan bir milliondan ortiq ziyoratchi kelgan. Hajga kelganlarning 53 foizi erkaklar, 47 foizi esa ayollardir. Ziyoratchilarning 94 foizi havo yo‘li bilan, 4,83 foizi quruqlikdagi chegara punktlari orqali, taxminan, 0,5 foizi esa dengiz orqali yetib kelgan.
Makka shahrida yashamaydigan 269 678 nafar ruxsatnomasiz bo‘lgan kishining muqaddas shaharga kirishi to‘xtatilgan. 252 ta soxta haj kampaniyasi qo‘lga olingan. Haj qoidalarini buzgan holda ziyoratchilarni olib ketayotgan 1 239 kishi hibsga olingan va 109 632 ta transport vositasi ortga qaytarilgan.
Izoh (0)