Бу йилги ҳаж мавсумида илк бор Falcon номли ўт ўчирувчи ва қутқарувчи дрон ишга туширилади. Бу ҳақда Саудия Арабистони фуқаролик мудофаасига таяниб, Arab News хабар берди.
Сунъий интеллект билан жиҳозланган дрон баланд тоғларда ёки чеккароқ ҳудудларда ёнғинларни ўчириш ва қутқарув ишларини олиб боришга мўлжалланган. У юқори баландликларда 12 соатгача парвоз қилиб, тахминан 40 килограммгача юк кўтариши мумкин.
Дрон ҳодиса жойидан жонли эфирга узатиш имкониятини ҳам беради. Унинг асосий афзалликлари тезкор жавоб бериш, ходимлар учун хавфни камайтириш ва реал вақт режимида тасвирга олиш орқали қарор қабул қилиш имкониятларидан иборат.
Саудия Арабистонига 2025 йилги ҳаж мавсуми учун хориждан бир миллиондан ортиқ зиёратчи келган. Ҳажга келганларнинг 53 фоизи эркаклар, 47 фоизи эса аёллардир. Зиёратчиларнинг 94 фоизи ҳаво йўли билан, 4,83 фоизи қуруқликдаги чегара пунктлари орқали, тахминан, 0,5 фоизи эса денгиз орқали етиб келган.
Макка шаҳрида яшамайдиган 269 678 нафар рухсатномасиз бўлган кишининг муқаддас шаҳарга кириши тўхтатилган. 252 та сохта ҳаж кампанияси қўлга олинган. Ҳаж қоидаларини бузган ҳолда зиёратчиларни олиб кетаётган 1 239 киши ҳибсга олинган ва 109 632 та транспорт воситаси ортга қайтарилган.
Изоҳ (0)