Samarqandda qurilish firmasi 30 ta noyob daraxtni noqonuniy kesib tashladi. Bu haqda viloyat Ekologiya boshqarmasi matbuot xizmati xabar berdi.
Maʼlum qilinishicha, Samarqand shahar “Bog‘imaydon” MFYda joylashgan 16-sonli Maktabgacha taʼlim tashkiloti hududida qo‘shimcha 150 o‘rinli bino qurish va hududda qayta qurilish ishlarini olib borayotgan “Samarqand maxsus suv drenaj” MCHJ tomonidan taʼlim tashkiloti hududida mavjud jami 31 tup daraxtni kesib tashladi.
Daraxtlarning 30 tupi qimmatbaho navlar ro‘yxatiga kiritilgan, diametri 6,6 smdan 24,5 smgacha bo‘lgan Eldor qarag‘ayi va 1 tup, diametri 27 sm bo‘lgan kam qimmatli terak hisoblanadi.
Olib borilgan tezkor o‘rganishlar jarayonida “Samarqand maxsus suv drenaj” MCHJ daraxtlarni noqonuniy tarzda kesib tashlashi oqibatida tabiatga 260 mln 620 ming so‘m zarar yetkazgani maʼlum bo‘ldi.
Mazkur holatda o‘simlik dunyosiga yetkazilgan zarar miqdorida jinoyat alomatlari borligi sababli aybdor shaxslarga nisbatan qonun talablariga muvofiq tegishli hujjatlar rasmiylashtirilib, huquqni muhofaza qiluvchi organlarga taqdim etildi.
Izoh (0)