Respublika bo‘yicha ajratilgan barcha kreditlarning to‘rtdan uch qismi Toshkent shahri hissasiga to‘g‘ri kelmoqda. Bu haqda Markaziy bank maʼlumot berdi.

2025-yil 1-avgust holatiga ko‘ra, O‘zbekiston banklaridagi jami kredit qoldig‘i 576,2 trln so‘mni tashkil etdi (2024-yil mos davrida 500,6 trln so‘m bo‘lgan). Foizli qarzlarning 392,5 trln so‘mini davlat, 183,7 trillion so‘mini xususiy banklar ajratgan.
Avgust oyi boshida aholiga berilgan kreditlar qoldig‘i 201,8 trln so‘m, korxonalarniki 374,4 trln so‘m bo‘lgan.
Hududlar kesimida eng ko‘p kreditlar Toshkent shahridagi aholi va korxonalarga ajratilgan — 286,4 trln so‘m. Bu respublikadagi jami kreditlarning teng yarmi hisoblanadi. Poytaxtda aholining jami kreditlari qoldig‘i 65,7 trln so‘m, korxonalarniki 220,6 trln so‘mni tashkil etmoqda.
Keyingi o‘rinlarda kreditlar ulushi nisbatan yuqori hududlar Farg‘ona (28,4 trln so‘m), Toshkent (27,6 trln so‘m) va Samarqand (27,5 trln so‘m) viloyatlari bo‘lgan.
Eng kam kredit qoldig‘i Sirdaryo viloyatida qayd etilgan — 15 trln so‘m.
Mamlakatda aholiga eng ko‘p kredit ajratgan bank “Ipotekabank” bo‘lgan — 25,5 trln so‘m. Davlatga qarashli banklar orasida O‘zmilliybank har ikki segmentga nisbatan yuqori miqdorda kredit ajratgan — aholiga 20,6 trln so‘m, korxonalarga 85,3 trln so‘m.
Markaziy bank mamlakatda mehnatga yaroqli har ming aholining 224 nafarida kredit borligini bildirgandi.
Izoh (0)