AQSHning Texas shtati, Ostin shahridagi Target do‘koni avtoturargohida 11-avgust kuni otishma sodir bo‘ldi. Politsiya 30 yoshlar atrofidagi ruhiy muammolari bo‘lgan Bleyn Nineker ismli erkak 3 kishini otib o‘ldirganini ma’lum qildi. Bu haqda Newsweek xabar berdi.
Ma’lum qilinishicha, gumondor hujumdan so‘ng avval bir mashinani o‘g‘irlagan. Unda avtohalokatga uchragach, erkak dilerlik markazidan yana bir boshqa mashinani olib qochgan. Shundan so‘ng, taxminan 32 kilometr narida politsiya uni elektroshoker yordamida qo‘lga olgan.
Ikki kishi voqea joyida, yana biri esa shifoxonada vafot etgan. Politsiya hozirda hodisa tafsilotlarini o‘rganmoqda va guvohlardan videoyozuvlarni taqdim etishni so‘ramoqda. Ostin politsiyasi boshlig‘i Liza Devis voqea sodir bo‘lgan kuni jurnalistlarga shunday intervyu bergan:
“Biz adolatni ta’minlash maqsadida jabrlanganlar kerakli yordamni olishlarini ta’minlaymiz. Bu Ostin uchun juda qayg‘uli kun bo‘ldi. Hammamiz uchun ham juda qayg‘uli kun. Ularning oila a’zolariga hamdardlik bildiraman”.
Ma’lumotlarga ko‘ra, gumondor Bleyn Nineker 2011-yildan beri ruhiy kasallikdan aziyat chekib keladi. U shu paytgacha bir necha bor jinoiy javobgarlikka tortilgan, xususan, o‘z oila a’zosini kaltaklagan, mast holda ikki marta mashina haydagan va mulkka zarar yetkazgan.
Izoh (0)