Xorazm viloyatining Gurlan tumanida pul evaziga “mehnat staji qilib beruvchi” mutaxassis ushlandi. Bu haqda DXX matbuot xizmati xabar berdi.
Gurlan tumanidagi “Soliq servis” davlat unitar korxonasi bosh mutaxassisi o‘z mavqeyidan foydalangan holda soliq idoralaridagi tanishlari orqali ikki nafar mahalliy fuqaroga ular muqaddam hech qayerda ishlamagan bo‘lsa-da, 2025-yil yanvar oyidan iyun oyiga qadar bo‘lgan davrda ularga ish haqi hisoblab, bu haqida ma’lumotnoma rasmiylashtirib berishini aytgan.
DXXning Xorazm viloyati bo‘yicha boshqarmasi tomonidan Bosh prokuraturaning Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda mutaxassis o‘z xizmati evaziga 12 million 500 ming so‘m olgan vaqtida ushlangan.
Unga nisbatan jinoyat ishi qo‘zg‘atilib, tergov harakati olib borilmoqda. Jinoyat kodeksining 228-moddasiga ko‘ra, hujjatlarni qalbakilashtirish, sotish BHMning 50 baravaridan 100 baravarigacha miqdorda jarima yoki 360 soatgacha majburiy jamoat ishlari yoxud 3 yilgacha axloq tuzatish ishlari bilan jazolanadi.
Bundan bir necha kun avval Toshkent shahrida o‘tkazilgan tezkor tadbirda o‘zini Davlat xavfsizlik xizmati xodimi sifatida tanishtirgan Namangan shahrida yashovchi fuqaro qo‘lga olingandi.
Izoh (0)