Ekologiya, atrof-muhitni muhofaza qilish va iqlim o‘zgarishi vazirligi Toshkent viloyatining Yangiobod hududidagi sobiq uran konida rekultivatsiya ishlari yakunlanganini ma’lum qildi.
Yangiobod—Toshkent viloyati, Angren shahri maydoniga tegishli joy bo‘lib, bu yer SSSR davrida maxfiy uran koni sifatida mashhur bo‘lgan. Angren shahar hokimligi matbuot xizmati axborotiga ko‘ra, O‘zbekiston Markaziy Osiyodagi sobiq uran qazib olish obyektlarida rekultivatsiya ishlari olib borilgan ikkinchi mamlakatdir.
Ekologiya vazirligining ma’lum qilishicha, Yangiobod obyektidagi ishlar 2024-yil fevral oyidan boshlangan. Bunda hududda istiqomat qiluvchi mahalliy aholi vakillari va tegishli tashkilotlar bilan maslahatlashilgan. Bugungi kunga qadar rekultivatsiya qilingan maydonlar geodezik tasvirga olingan, 850 metr uzunlikdagi kirish yo‘llari qurilgan, obyektning barcha uchastkasida beton va g‘isht qurilmalari hamda temir-beton konstruksiyalari buzilib, zararlangan beton qoldiqlarini yo‘q qilish uchun saqlash joyi (poligon) barpo qilingan.
O‘rganish davomida, shuningdek, hududda yer usti suvlarini drenajlash tizimi qurilgani, shaxta va shtolnya (konchilikda foydalanish uchun yer yuzasiga chiqish yo‘li bo‘lgan, gorizontal yoki qiya qazilgan kon inshooti) yopilgani, shaxta drenajlarini infiltratsiya (suyuqlik yoki gazning g‘ovak, yoriq va boshqa kichik bo‘shliqlar orqali qattiq jins yoki tuproqqa kirib borishi) qilish uchun transheya (kerakli uzunlikda qazilgan chuqurlik) hosil qilingani, ko‘milgan qoldiqlar va yuvilgan rudalar ustiga qoplama o‘rnatilgani ma’lum bo‘ldi.
Qolaversa, uchastkalar bo‘ylab daryo qirg‘oqlari himoya choralari bilan ta’minlangan, zararlangan qatlam ustiga himoya qatlami yotqizilgan, shtolnyadan chiqayotgan chiqindi suv uchun diametri 1000 mm bo‘lgan polipropilen quvurlar yotqizilgan.
Bundan tashqari, uran konlarini zararsizlantirishda samarali ishlar amalga oshirilganligi, mehnatni muhofaza qilish va xavfsizlik choralariga amal qilinayotgani alohida ta’kidlandi.
YTTB bilan Toshkent viloyatidagi Yangiobod va Namangan viloyatidagi Chorkesar-2 uran konlari obyektlarini rekultivatsiya qilish to‘g‘risida qiymati 9 million yevro bo‘lgan grant bitimi imzolangan. Bu loyiha Yangiobod va Chorkesar hududlaridagi radioaktiv nurlanishni yo‘qotib, xavfsiz hududga aylantirish va bu orqali aholi salomatligini yaxshilashga qaratilgan. Ushbu loyiha doirasida Chorkesar-2 sobiq uran konida rekultivatsiya ishlari 2024-yil avgust oyida yakunlangan bo‘lib, barcha kerakli chora-tadbirlar amalga oshirilgan.
Rekultivatsiya — foydali qazilmalarni qazib olish, suv inshootlari qurish, shaharlar qurilishi va boshqa sabablarga ko‘ra foydalanishga yaroqsiz bo‘lib qolgan yerlarni qayta tiklash, atrof muhit sharoitlarini, ekologik holatlarni yaxshilashga qaratilgan tadbirlar majmui.
Izoh (0)