“Hizbulloh” rahbari Isroilga raketalar yog‘dirish bilan tahdid qildi

“Hizbulloh” harakati rahbari Naim Qosim 5-avgust kuni to‘g‘ridan to‘g‘ri Isroilga tahdid qildi. U telemurojaat orqali agar yahudiy davlati Livanga hujum boshlasa, “Hizbulloh” bunga raketali zarba bilan javob berishini aytdi. Bu haqda Al Arabiya xabar berdi.

Mazkur bayonot Livan hukumati “Hizbulloh”ning qurollanishini cheklayotgan paytda yangradi. Ayni paytda esa AQSH Tehron tomonidan qo‘llab-quvvatlanadigan guruhni qurolsizlantirish bo‘yicha Bayrutga bosim o‘tkazmoqda. 

Isroil Livanga qarshi keng miqyosdagi tajovuzga qo‘l uradigan bo‘lsa, “Hizbulloh” Livan armiyasi va xalqini o‘zi himoya qiladi. Isroil hududiga raketalar uchiriladi va ularning 8 oy davomida yaratgan xavfsizlik tizimi bir soat ichida yakson bo‘ladi, dedi Qosim.

Ma’lumot uchun, AQSH vositachiligida 2024-yil noyabr oyida erishilgan sulh Isroil va “Hizbulloh” o‘rtasidagi bir necha oylik qurolli to‘qnashuvlarga yakun yasagan edi. Mazkur urushda harakatning yuqori martabali rahbarlari, jumladan Naim Qosimning o‘rnida bo‘lgan shaxs — Hassan Nasrulloh halok bo‘lib, qurol-aslahalarning katta qismi yo‘q qilingan edi.

Qosim bu borada bayonot berar ekan, urushda 5 ming nafar “Hizbulloh” jangchisi halok bo‘lgani, ularning 13 ming nafari esa yaralanganini ma’lum qilgan. Shunga qaramay, u harakat “tartibli va jangga tayyor” holatda qolayotganini, zarurat tug‘ilsa, eng og‘ir qurbonliklarga tayyor ekanini ta’kidlagan.

AQSH va Livan iyun oyidan buyon “Hizbulloh”ni qurolsizlantirish bo‘yicha “yo‘l xaritasi” ustida muzokaralar olib bormoqda. Rejaga ko‘ra, harakat qurollarni topshirishi evaziga Isroil o‘z hujumlarini to‘xtatadi, janubdagi 5 ta mojaroli hududdan yahudiy qo‘shinlari olib chiqiladi va urushda vayron bo‘lgan hududlarni tiklash uchun mablag‘ ajratiladi.

Ammo muzokaralarda sezilarli siljish bo‘lmagach, AQSH Livan vazirlaridan tez fursatda rasmiy bayonot berishni talab qilgan. Qosim esa bu bosimlarga qarshi chiqib, Isroil oldin harbiy harakatlarini to‘xtatmas ekan, hech qanday masala — qurol va kelishuv — muhokama qilinmasligini bildirgan.

“Avvalo Isroil tajovuzi to‘xtatilsin. Shundan so‘nggina qurol masalasini muhokama qilamiz”, degan u.