Turk yulduzlarining rolga kirishib ketishiga yordam beradigan 5 ta siri

Turk seriallarining parda ortiga nazar tashlab, “Qalbim eshigini qoq”, “Uzoq shahar”, “Qo‘rg‘on sirlari” va boshqa mashhur seriallarda turk aktyor va aktrisalari qanday qilib shunchalik ishonchli obrazlar yaratganiga lol qolish mumkin.

Ekranda kimnidir ishonchli tarzda ijro etish oson vazifa emas, chunki har birimiz o‘ziga xos shaxsmiz. Shu bois ko‘plab turk aktyor va aktrisalari jarayonni osonlashtirish uchun turli usullardan foydalanadi.

Dizining vatanida serial ishlab chiqarish konveyer usuliga asoslangan, shuning uchun yulduzlarning hech biri o‘z qahramonini chuqur his etish va uning yashirin zaif tomonlari hamda kuch-qudratini anglash uchun ko‘p vaqtga ega emas. Aynan shu sababli, tomoshabinlarga sevimli aktyor yoki aktrisani faqat bitta qahramon bilan bog‘lamaslikka yordam beradigan usullarga murojaat qilish zarur. Kerem Bursin, Hande Erchel, Ozan Akbaba va boshqa dizi yulduzlari ularga ishonishimiz uchun nima qilishmoqda? Quyida bu haqda bilib olasiz.

1. Maxsus qo‘shiqlar ro‘yxatini tuzish

   

Rolga kirish uchun musiqadan foydalanish ko‘plab aktyor va aktrisalar qo‘llaydigan asosiy hayotiy maslahatlardan biridir. Masalan, Kerem Bursinning har bir qahramoni uchun alohida qo‘shiqlar ro‘yxati mavjud bo‘lib, ularni muxlislar ham baholashi uchun ochiq holda joylashtirgan.

“Qo‘rg‘on sirlari” serialidagi Mert Ramazan Demir esa rolga kirishish uchun ma’lum musiqalarni tinglaydi. Agar unga dinamik sahnani ijro etish kerak bo‘lsa, u opera qo‘yadi, romantik va ehtirosli sahnalar oldidan esa yigitga instrumental qismlar yordam beradi.

Bunday yondashuv tufayli ayrim musiqalar qahramon bilan bog‘lanib qoladi, shuning uchun rolga kirish juda oson va tez kechadi. Ishonchimiz komilki, sizda ham ba’zi musiqalar bilan bog‘liq xotiralar bor, shuning uchun siz ham buning qanday ishlashini tushunasiz.

2. Tashqi ko‘rinishdagi tub o‘zgarishlar — ekranda ishonchli obraz uchun yo‘l

   

Agar siz ekranda boshqa odamga aylanmoqchi va buni ishonchli tarzda amalga oshirmoqchi bo‘lsangiz, hozirgi o‘zingizni unutishingiz kerak. Aynan shu sababli ba’zi turk aktyorlari yangi rollar uchun tashqi ko‘rinishlarini tubdan o‘zgartirishni ma’qul ko‘rishadi. Bunday “hayotiy hiyla”ni yoqtiruvchilar orasida ko‘pincha Jan Yaman ham bor.

U qisqa vaqt ichida soqol o‘stirishi yoki bunday uslub o‘ziga yoqsa ham, soqolini butunlay oldirib tashlashi mumkin. Bularning barchasi tomoshabinlar qadrlaydigan haqiqiylik uchun qilinadi. Masalan, “Sandokan” serialidagi roli uchun Jan bir necha yil davomida sochini oldirmagan. Ha, aktyor uchun har kuni ko‘zguda o‘zini emas, balki butunlay boshqa va mutlaqo notanish odamni ko‘rish shunchalik muhim edi.

Kivanch Tatlitug‘ ham xuddi shu usulni qo‘llashni ma’qul ko‘radi. Uni Turkiyaning eng mashhur aktyorlaridan biri deb hisoblashlari bejiz emas. Masalan, “Kapalak tushi” filmida shoir Muzaffar Tayip Uslu rolini ijro etish uchun, kasallikdan holsizlangan qahramonni to‘liq his qilish maqsadida 10 kilogramm vazn tashlashga majbur bo‘lgan.

3. Personaj bilan “uchrashuv”ga borish

   

Bunday qiziqarli yondashuv Kerem Bursinning juda ham yoqtirgan usuli. “Qalbim eshigini qoq” serialida aktyor rolga to‘liq kirishib ketish uchun o‘z qahramonini xuddi “romantik qiziqish” bilan o‘rganishni afzal ko‘radi. Tushunamiz, g‘alati tuyulishi mumkin, lekin ko‘rib turganingizdek, bu usul juda samarali natija beradi.

“Men ham qahramonlar bilan tanishishni munosabat o‘rnatishdek ko‘raman. Buni kechki ovqatga borishga o‘xshataman. Ssenariyni birinchi marta o‘qiganingizda, qahramonni biroz tahlil qila boshlaysiz. Yoqadimi yoki yo‘qmi, bir-biringizga mos kelasizmi yoki yo‘qmi, shularni o‘ylaysiz”, deydi Kerem Bursin.

Aytgancha, bunday usulni qo‘llaydigan yagona aktyor u emas. “Muhtasham yuz yil” serialida Mohidavron rolini ijro etgan aktrisa Nur Fettaho‘g‘lu o‘z qahramonini nafaqat tushunishga, balki uni oqlashga ham harakat qilgan. Shu tufayli u Xurremga nisbatan g‘azab va nafratni ishonchli tarzda ijro eta olgan, chunki sultonning sevgilisi undan uzoq vaqt davomida mashaqqatli mehnat va itoatkorlik bilan erishgan barcha narsasini tortib olgan edi.

4. Amaliyotlar va psixolog bilan ishlash orqali personajga to‘liq singib ketish

   

Rol to‘liq ishonchli bo‘lish uchun ba’zi turk yulduzlari yangi kasblarni butunlay o‘zlashtirishga ham tayyor. Masalan, Hande Erchel “Mutlaqo boshqacha” serialida Laylo rolini o‘ynashga tayyorgarlik ko‘rayotganda shunday yo‘l tutdi va u yerda Burak Deniz bilan ikkinchi marta hamkorlik qildi. Ko‘pchilik bilmasa-da, aktrisa tayyorgarlikka juda jiddiy yondashdi.

Hande nafaqat hamma narsa ichkaridan qanday ishlashini tushunish balki yangi obrazga to‘liq kirishish uchun Turkiya prokuraturasida to‘liq amaliyot o‘tadi hamda psixolog bilan ham ishladi. Bu dissotsiativ shaxsiyat buzilishi bo‘lgan odam bilan muloqotni qanday qurish kerakligini tushunish uchun zarur edi, toki kadrdagi har bir ziddiyat ishonchli ko‘rinsin.

Hande Erchel bundan tashqari aktyorlik mahorati bo‘yicha o‘qituvchilar bilan yurishi va ovoz tembrini butunlay o‘zgartirish uchun ishlagan. Hatto loyiha chiqqandan keyingi intervyularida ham aktrisa bularning barchasi unga juda qiyin bo‘lganini tan oldi.

“Laylo menga butunlay zid shaxs. Bir necha oy davomida tabassum qilish odatimdan voz kechib, o‘zimda uning sovuqligini ko‘rsatishga majbur bo‘ldim”, deydi Hande Erchel.

Natijada hatto eng kuchli tanqidchilar ham qizning rol ustidagi ishini yuqori baholab, uning filmga to‘liq sho‘ng‘iganini ta’kidladi. Handening ishonchsiz ko‘rinayotgani yoki biror joyda bo‘rttirib rol o‘ynayotgani haqidagi tanqidiy fikrlar odatdagidan bir necha baravar kam bo‘ldi.

5. Murakkab sahnalarni “ijro etish” uchun real hayot tajribasidan foydalanish

Albatta, turk seriallarida dramatik sahnalar juda ko‘p, lekin haqiqiy yig‘lash uchun maxsus tomchilardan foydalanish doim ham to‘g‘ri yechim emas. Chunki tomoshabinlarga ko‘rsatilayotgan tasvirga mos keladigan mimika va imo-ishoralarni ifodalash uchun hissiyotlarni chinakamiga his qilish kerak.

Ozan Akbaba kadrda ishonchli o‘ynash uchun shaxsiy hikoyalar va tajribalardan foydalanishning ustasi. Suratga olishning birinchi yarmida xotini va o‘g‘li Istanbulda qolgani, o‘zi esa ulardan uzoqda, Mardinda qolishga majbur bo‘lgani sababli, dramatik sahnalarni ijro etish unga oson bo‘lgan. Suratga olish maydonchasidagi insayderning aytishicha, murakkab sahnalardan oldin aktyor ataylab farzandiga qo‘ng‘iroq qilgan, chunki u bilan suhbatlashgandan so‘ng sog‘inch shunchalik kuchayganki, ko‘z yoshlari o‘z-o‘zidan oqib kelgan.