AQSH prezidenti Donald Tramp Ukrainaga yuzlab million dollarlik yangi qurol va jihozlar yetkazib berish imkoniyatini ko‘rib chiqmoqda. Bu haqda Politico nashri yozmoqda.
Nashrning yozishicha, ajratiladigan mablag‘lar Jo Bayden davrida Kongress tomonidan tasdiqlangan fonddan olinishi rejalashtirilgan. U yerda hali taxminan 3,8 milliard dollar qolgan. Paketda Patriot raketalari va o‘rta masofaga mo‘ljallangan qurollar bo‘lishi mumkin.
“Trampning rejasi bilan tanish bo‘lgan ikki kishining so‘zlariga ko‘ra, Amerika prezidenti Ukrainaga yuzlab million dollarlik yangi harbiy yordam paketini ko‘rib chiqmoqda”, deyiladi e’lon qilgan maqolada.
Nashr ma’lumotlariga ko‘ra, harbiy yordamning yangi paketi AQSH prezidenti ma’muriyati ichidagi Kiyev rejimini qo‘llab-quvvatlash masalasidagi ichki kelishmovchiliklarni yana bir bor yuzaga chiqaradi.
NBC telekanali 4-iyul kuni xabar berishicha, Kiyevga harbiy yordamni to‘xtatib turish qarorini Pentagon rahbari Pit Hegset yakka o‘zi qabul qilgan.
CNN telekanali esa keyinroq ma’lum qilganidek, Hegset bu qarori haqida AQSH prezidenti Donald Trampning ma’muriyatini oldindan xabardor qilmagan. Associated Press agentligi ham Pentagon qarori Tramp uchun kutilmagan bo‘lganini xabar qilgan.
AQSH prezidenti keyinroq bu harbiy yordamni to‘xtatish bo‘yicha qarorni kim tasdiqlagani haqida o‘zi ham bilmasligini aytgan edi.
Izoh (0)