Sudlanganlik holatiga qarab shaxsni davlat fuqarolik xizmatiga ishga qabul qilish yoki qilmaslik hal etiladi. Bu haqda mehnat huquqi bo‘yicha mutaxassis Saidali Muxtoraliyev “Daryo”ga tushuntirish berdi.
Qanday holatlarda ishga qabul qilish mumkin emas?
“Davlat fuqarolik xizmati to‘g‘risida”gi qonunning 28-moddasiga ko‘ra, og‘ir va o‘ta og‘ir jinoyatlarni sodir etganlik uchun sudlanganlik holati tugallanmagan yoki olib tashlanmagan shaxslarni davlat fuqarolik xizmatiga ishga qabul qilish mumkin emasligi belgilangan.
Og‘ir jinoyatlarga qasddan sodir etib, qonunda 5 yildan ortiq, lekin 10 yildan ko‘p bo‘lmagan muddatga ozodlikdan marhum qilish jazosi nazarda tutilgan jinoyatlar kiradi. O‘ta og‘ir jinoyatlarga qasddan sodir etilib, qonunda 10 yildan ortiq muddatga ozodlikdan mahrum qilish yoxud umrbod ozodlikdan mahrum qilish jazosi nazarda tutilgan jinoyatlar kiradi (Jinoyat kodeksining 15-moddasi).
Demak, qasddan og‘ir va o‘ta og‘ir jinoyatlarni sodir etgan shaxslarning sudlanganlik muddati tugallanmagan yoki olib tashlanmagan bo‘lsa, ularni davlat fuqarolik xizmatiga ishga qabul qilish mumkin emas.
Sudlanganlik holati tugallanganligi
Jinoyat kodeksi bo‘yicha 5 yildan ortiq, lekin 10 yildan ko‘p bo‘lmagan muddatga ozodlikdan mahrum qilish jazosi nazarda tutilgan va qasddan sodir etilgan jinoyatni og‘ir jinoyat deb olyapmiz, to‘g‘rimi? Jinoyat kodeksining 78-moddasi "E" bandiga asosan bunday jinoyatlar bo‘yicha jazo o‘tab bo‘linganidan keyin 7 yil o‘tgach, sudlanganlik holati tugallangan hisoblanadi. O‘ta og‘ir jinoyatlar bo‘yicha esa, Jinoyat kodeksining 78-moddasi "J" bandi bo‘yicha jazo o‘talgach (10 yildan ortiq, 15 yildan ko‘p bo‘lmagan ozodlikdan mahrum qilish jazosi o‘talgach) 10 yildan keyin sudlanganlik muddati tugagan hisoblanadi.
Sudlanganlikni olib tashlanganligi
Jinoyat kodeksining 79-moddasiga asosan alohida hollarda sudlanganlik muddatidan oldin ham olib tashlanishi mumkin. Sudlanganlikni olib tashlash mahkumning yashash joyidagi jinoiy ishlar bo‘yicha sudlarning ajrimi bilan amalga oshiriladi. Demak, og‘ir va o‘ta og‘ir jinoyati uchun sudlanganlikni olib tashlash haqidagi sud ajrimini taqdim etgan shaxsni davlat fuqarolik xizmatiga ishga qabul qilish mumkin.
Korrupsionerlar
“Davlat fuqarolik xizmati to‘g‘risida”gi qonunning 28-moddasida ishga qabul qilish mumkin bo‘lmagan shaxslar qatoriga korrupsiyaga oid jinoyatlarni sodir etishda sud tomonidan aybdor deb topilgan shaxslar ham kiritilgan.
Davlat xizmatiga qaytolmaydi
DXX 7-iyul kuni uch hududda hokim o‘rinbosari hamda agentlik va inspeksiya xodimlari pora bilan ushlangani haqida xabar berdi. Unda aytilishicha, Beruniy tumani hokimining o‘rinbosari, Agrosanoat majmui ustidan nazorat qilish inspeksiyasining Andijon viloyati boshqarmasida bo‘lim boshlig‘i pora olgan vaqtida ushlangan. Agar ushbu shaxslar sud tomonidan aybdor deb topilsa, davlat fuqarolik xizmatiga qaytolmaydi.
Izoh (0)