Ilon Maskning SpaceX kompaniyasiga tegishli Starship kosmik kemasi sinov parvozi paytida portlab ketdi.
Ma’lum qilinishicha, hodisa 18-iyun kuni mahalliy vaqt bilan soat 23:00 atrofida Texas shtatidagi Starbase kosmodromida yuz bergan. Raketa 10-sinov parvoziga tayyorlanayotgan bo‘lgan. Portlash dvigatellarni sinovdan o‘tkazish paytida kuzatilgani aytilmoqda.
Dastlab raketaning birinchi pog‘onasidagi dvigatel portlagan. So‘ngra ikkinchi pog‘onada yoqilg‘i sizib chiqishi yuz bergan. Oqibatda raketa boshqaruvdan chiqqan. Static fire test deb ataladigan sinovda dvigatellar ishga tushiriladi, ammo raketaning o‘zi uchirish maydonchasida mahkamlangan holda qoladi.
Starbase jamoamiz mahalliy rasmiylar bilan birgalikda poligon va uning atrofidagi hududni xavfsizlantirish uchun faol ish olib bormoqda. Atrofda yashovchi aholi uchun hech qanday xavf yo‘q va qutqaruv ishlari davom etayotgan bir paytda fuqarolardan hududga yaqinlashmaslikni so‘raymiz, deyilgan SpaceX bayonotida.
Ilon Mask Starship’ni rivojlantirish uchun milliardlab dollar sarflagan. Bu tashabbus uning kosmik kema yordamida Mars sayyorasini mustamlaka qilish rejasining bir qismidir. SpaceX 50 yildan ortiq vaqt ichida birinchi marta odamlarni Oyga yuborish uchun AQSH davlat agentligi — NASA bilan ishlamoqda.
Tez-tez uchrab turadigan nosozliklar va raketalarning katta o‘lchamlari sababli SpaceX’ning sinov parvozlari hozirgacha bir necha bor AQSHning janubiy shtatlari hamda Karib dengizi hududlariga raketa bo‘laklarining tushishiga sabab bo‘lgan.
Izoh (0)