AQSH Yaqin Sharqda joylashgan bazalaridagi qo‘shinlarini shay holatga keltirdi. Bu haqda manbalarga tayanib The New York Times xabar berdi.
Ma’lum qilinishicha, qo‘shinlar AQSH prezidenti Donald Tramp harbiy qo‘mondonlik va milliy xavfsizlik bo‘yicha maslahatchilar bilan favqulodda yig‘ilish o‘tkazganidan so‘ng shay holatga keltirilgan. Yig‘ilishda Isroil va Eron o‘rtasidagi kuchayib borayotgan ziddiyat muhokama qilingan. AQSHning Eron yadroviy obyektlariga, jumladan, Fordodagi obyektga zarba berishda ishtirok etishi ehtimoli ko‘rib chiqilgan.
Kuchaytirilgan xavfsizlik choralari Birlashgan Arab Amirliklari, Iordaniya va Saudiya Arabistonidagi bazalarga ta’sir ko‘rsatdi. Yaqin Sharqda 40 mingdan ortiq amerikalik harbiy xizmatchi bor.
Eron AQSH harbiy bazalarini nishonga olishi mumkin
Trampning eng yaqin maslahatchilari orasida Eronga zarba berish zarurati bo‘yicha yakdil fikr yo‘q. Shu bilan birga, razvedka ma’lumotlari bilan tanish bo‘lgan Amerika rasmiylariga ko‘ra, Tehron mintaqadagi Amerika bazalariga hujum qila oladigan raketalar va boshqa harbiy texnikalarni shay holatga keltirgan. Agar AQSH Isroilga qo‘shilib mojaroda ishtirok etsa, Eron shunday chora ko‘rishi mumkin.
Isroilning Eron yadroviy obyektlariga bergan zarbalaridan so‘ng, AQSH hujumga qo‘shilishi prognoz qilinmoqda. CNN ma’lumotlariga ko‘ra, Isroil hukumatining yuqori martabali vakillari Donald Tramp ularning sa’y-harakatlarini qo‘llab-quvvatlashiga va boshlagan ishlarini yakunlashga yordam berishiga umid qilmoqda.
Butun operatsiya unga qachondir AQSH ham qo‘shilishiga asoslangan, deydi isroillik amaldor.
AQSH yahudiy davlatiga qanday yordam bera oladi?
Isroil harbiylari Eronning eng himoyalangan yadroviy inshootlaridan biri — Fordodagi obyektni yo‘q qilish yoki vaqtincha ishdan chiqarish bo‘yicha bir nechta rejaga ega. Ammo bu rejalar AQSHning 30 ming funtli maxsus bomba tashiy oladigan strategik samolyotlari darajasida kuchli emas. Bu samolyotlar yer ostidagi obyektlarga ham zarba bera oladi.
Isroil armiyasida tog‘li hududda katta chuqurlikda joylashgan obyektga samarali zarba berish uchun zarur bo‘lgan arsenal, xususan, bunker bombalari va og‘ir bombardimonchi samolyotlar yo‘q. AQSH esa tegishli qurollarga va yaqin atrofdagi bazalardan zarba berish imkoniyatiga ega.
Tramp yaqinda Isroil bosh vaziri Binyamin Netanyaxu bilan suhbatda zarurat tug‘ilganda shunday qadam ko‘rsatishi mumkinligini istisno etmagan. Biroq hozirda AQSH bunday imkoniyatni ko‘rib chiqmayapti.
Oq uyning yuqori martabali mulozimiga ko‘ra, Vashington urushga to‘g‘ridan to‘g‘ri aralashishni xohlamaydi, hatto gap “bitta zarba” haqida ketayotgan bo‘lsa ham. AQSH mojaroni diplomatik yo‘l bilan hal qilishga umid qilmoqda.
Ba’zi mutaxassislar fikricha, Isroil bunker bombalar ta’sirini hosil qilish uchun bir nishonni qayta-qayta bombardimon qilishi mumkin. Biroq bundan-da xavfliroq yo‘l — maxsus kuchlarni obyektga reydga yuborish bo‘lishi mumkin.
Izoh (0)