Farg‘ona, Samarqand va Qashqadaryo viloyatlarida yerni noqonuniy sotmoqchi bo‘lgan shaxslar ushlandi.
Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan ichki ishlar organlari bilan hamkorlikda o‘tkazilgan tezkor tadbirda Uchko‘prik tumanida yashovchi, 1968-yilda tug‘ilgan shaxs o‘zganing tekstil mahsulotlari ishlab chiqarishga ixtisoslashgan MCHJga qarashli Farg‘ona shahridagi aksiyadorlik tijorat banklaridan birida garovda turgan 12 sotix yer maydonini 130 ming dollarga sotishga kelishib, oldindan 109 ming dollarni olgan vaqtida ashyoviy dalillar bilan ushlangan.
Xizmatning Samarqand viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda o‘tkazilgan tezkor tadbirda Urgut tumanida yashovchi, 1991-yilda tug‘ilgan fuqaro tumandagi g‘allachilikka ixtisoslashgan fermer xo‘jalikning sug‘oriladigan yer maydonidan 50 sotixini 80 ming dollarga sotishga kelishib, kadastr idoralaridagi tanishlari orqali hujjatlarini rasmiylashtirib berishini aytib, kelishilgan puldan 30 ming AQSH dollarini olgan vaqtida ashyoviy dalillar bilan ushlangan.
Xizmatning Qashqadaryo viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda o‘tkazilgan tezkor tadbirda Qarshi tumani hokimligining qishloq xo‘jaligi bo‘limi boshlig‘i o‘rinbosari chorvachilik yo‘nalishida foydalanish maqsadida fuqaroga tuman hokimligi zaxirasidagi 25 gektar yer maydonini mansabdor tanishlari orqali uning nomiga rasmiylashtirib berish evaziga 10 ming dollar talab qilib, 5 ming AQSH dollarini olgan vaqtida ashyoviy dalillar bilan ushlangan.
Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
Izoh (0)