O‘zbekiston tumanlaridagi davolash o‘rinlarining 5 foizi nogironligi bo‘lganlarni reabilitatsiya qilishga ajratiladi, tuman markaziy shifoxonalarida tibbiy reabilitatsiya xonalari tashkil etiladi. Bu haqda davlat rahbari raisligida o‘tkazilayotgan yig‘ilishda ma’lum qilindi.
Protez vositalari 18 turdan 30 turga, ajratilayotgan mablag‘ esa 1,5 barobar oshirilib, 100 milliard so‘mga yetkaziladi hamda ular bilan taʼminlash elektron shaklda bo‘ladi.
Nogironligi bo‘lgan shaxslar bunday vositalarni uydan turib, vaucher orqali onlayn yoki “Inson” markazi yordamida istalgan ishlab chiqaruvchidan olishi mumkin bo‘ladi.
Shuningdek, mutasaddilarga nogironligi bo‘lgan shaxslarga dori vositalarini tarqatishda ham tartib o‘rnatib, shaffof tizim yaratish topshirildi. Bu uyda o‘tirgan nogironligi bor shaxslarning harakatlanishi yengillashishiga, bilim olishi va kasbiy ko‘nikma egallashi, mehnat qilishi yoki sport bilan shug‘ullanishi uchun imkoniyat yaratilishiga xizmat qiladi. Protezlarni olish muddati qisqaradi.
Bundan tashqari, bino va inshootlarni qurishdagi loyihachi nogironligi bo‘lganlar uchun qulay muhit yaratilganligi bo‘yicha ham majburiy ekspertizadan o‘tkaziladi. Xorijiy mutaxassislar ishtirokida joriy yilda kamida 500 nafar loyihachi va arxitektorni nogironligi bo‘lgan shaxslar uchun to‘siqsiz muhit yaratishga o‘qitish vazifasi qo‘yildi.
Poytaxtdagi bekatlarni, jamoat transporti, jumladan, metroni nogironligi bor odamlarga moslashtirish bo‘yicha ikki yillik dastur amalga oshiriladi. Bu ishlarni hududlarda ham boshlash bo‘yicha viloyat hokimlariga topshiriq berildi.
Barcha davlat idoralari saytlarini nogironligi borlar uchun qulay shaklga keltirish zarurligi qayd etildi.
Izoh (0)