O‘zbekistonda 2023-yilda tez yordam xizmatiga 3,5 mingdan ortiq yolg‘on chaqiriq kelib tushdi. Bu haqda Respublika tez tibbiy yordam markazi direktori Abduvoit Gafurov ma’lum qildi.
Qayd etilishicha, tez tibbiy yordam xizmati faoliyatiga salbiy taʼsir etuvchi omillar ko‘p. Ayniqsa, yolg‘on chaqiriqlar sababli aksariyat hollarda tibbiyot brigadalari chaqiriq manziliga o‘z vaqtida yetib bora olmaydi.
Oqibatda shifokorlar haqiqiy yordamga muhtoj bemorlar qolib, yolg‘on qo‘ng‘iroq egasi va uning manzilini aniqlashtirish bilan ovora bo‘ladi.
“O‘tgan 2023-yilda ‘103’ xizmatiga jami 3505 ta yolg‘on chaqiriq kelib tushdi. Quvonarlisi, mazkur ko‘rsatkichni 2022-yil bilan taqqoslasak, asossiz murojaatlar soni sezilarli darajada kamayganini ko‘rish mumkin. Ammo shunga qaramay, ayrim hududlarda yolg‘on murojaatlar soni hamon yuqoriligicha qolmoqda, — deydi Abduvoit Gafurov.
Tahlillarga ko‘ra, 2023-yilning o‘tgan o‘n ikki oyi davomida eng ko‘p bunday chaqiriq Toshkent viloyatida qayd etilib, bu raqam 630 tani tashkil etgan. Keyingi o‘rinda 518 ta chaqiriq bilan Farg‘ona viloyati joylashgan. Shuningdek, Qashqadaryo viloyatidan 502 ta ana shunday murojaat kelib tushgan. Eng kam yolg‘on chaqiriq esa Samarqand viloyatida ro‘yxatga olindi — 19 ta.
Avvalroq Qashqadaryo viloyatida faoliyat olib boruvchi tez tibbiy yordam shifokorlari bemor ayolga qo‘pollik qilgani aniqlagani to‘g‘risida xabar berilgandi.
Izoh (0)