Vazirlar Mahkamasining “Ommaviy tadbirlarni o‘tkazishda fuqarolar xavfsizligini taʼminlash hamda jamoat tartibini saqlash tizimi takomillashtirilishi munosabati bilan O‘zbekiston Respublikasi hukumatining ayrim qarorlariga o‘zgartirish va qo‘shimchalar kiritish to‘g‘risida”gi qarori qabul qilindi, deb xabar beradi Norma.
Hujjat Milliy gvardiya hamda Ichki ishlar vazirligining ommaviy tadbirlarni tashkil etish va o‘tkazish vaqtida jamoat tartibini saqlash va fuqarolar xavfsizligini taʼminlash borasidagi vazifalari, huquqlari va majburiyatlarini aniq belgilab berish maqsadida qabul qilingan.
Xususan, Vazirlar Mahkamasining 2014-yil 29-iyuldagi 205-son qarori bilan tasdiqlangan ommaviy tadbirlarni o‘tkazish qoidalariga quyidagilarni o‘z ichiga olgan o‘zgartirish va qo‘shimchalar kiritilmoqda:
- ommaviy tadbirlarni, ularning ahamiyati, ko‘lami va ular o‘tkaziladigan hududga bog‘liq holda alohida, birinchi va ikkinchi toifalardagi tadbirlarga bo‘linishini belgilash;
- xususan, quyidagi ommaviy tadbirlar alohida toifadagi ommaviy tadbirlar jumlasiga kiradi: Yangi yil, Navro‘z bayrami, Mustaqillik kuni, Xotira va qadrlash kuni, Qurbon hayiti va boshqa bayramlar, taʼlim muassasalariga o‘qishga qabul qilish bo‘yicha test sinovlarini o‘tkazish, umumtaʼlim maktablarida o‘quv yilining boshlanishi va tugashiga bag‘ishlangan, saylov va referendumlarni o‘tkazish bilan bog‘liq, shuningdek, xalqaro hamkorlik tashkilotiga aʼzo davlat rahbarlari ishtirokida o‘tkaziladigan tadbirlar hamda futbol bo‘yicha xalqaro miqyosdagi uchrashuvlar;
- ichki ishlar organlari huzuridagi ommaviy tadbirlar o‘tkazilishini nazorat qilish komissiyalari faoliyatini tashkil etish, shuningdek, ularning tarkibi, maqomi va vakolatlarini belgilash;
- alohida va ikkinchi toifadagi ommaviy tadbirlarni o‘tkazishda fuqarolarning xavfsizligini va jamoat tartibini taʼminlashni ichki ishlar organlari, birinchi toifadagi ommaviy tadbirlarni o‘tkazishda — Milliy gvardiya zimmasiga yuklash.
Hujjat Qonun hujjatlari maʼlumotlari milliy bazasida eʼlon qilingan va 2023-yil 7-oktyabrdan kuchga kirdi.
Iyul oyida prezident farmoni bilan O‘zbekistonda ommaviy tadbirlar tashkil etish xususiy sektorga o‘tkazilishi to‘g‘risida xabar berilgandi. Shuningdek, 2024–2026-yillarda xalqaro festivallar, forumlar va respublika darajasidagi madaniy-ommaviy tadbirlarni tashkil etish va o‘tkazish ishlari bosqichma-bosqich xususiy sektorga o‘tkaziladi.
Izoh (0)