O‘tgan 6 oy ichida senatorlar 41 ta qonunni muhokama qilib, maʼqulladi — Senat

Senat 2023-yil birinchi yarmidagi faoliyati yuzasidan hisobot eʼlon qildi.

Maʼlum qilinishicha, hisobot davrida Senatning 6 ta yalpi majlisi o‘tkazilib ularda davlat va jamiyat hayotining turli sohalariga doir 50 dan ortiq masala ko‘rib chiqilgan. Jumladan, 41 ta qonun muhokama qilinib, senatorlar tomonidan maʼqullangan.

“O‘tgan davrda Senatga jami 6 720 ta murojaat kelib tushgan. Shundan 3,2 mingtasi (48 foiz) tegishliligi bo‘yicha vakolatli organlarga yuborildi. 2,1 mingta (31 foiz) murojaat yuzasidan huquqiy tushuntirish berildi. 389 ta murojaat (ijtimoiy yordam, ish bilan taʼminlash, aliment undirish) senatorlarning bevosita saʼy-harakatlari bilan ijobiy hal etildi. Senat raisining ijtimoiy tarmoqlardagi sahifalari orqali kelgan 367 ta murojaatning 60 tasi ijobiy hal qilindi, 270 tasi bo‘yicha har tomonlama asoslangan huquqiy tushuntirish berildi. Qolgan 37 tasi ko‘rib chiqilmoqda”, — deyiladi hisobotda.

Shu bilan birga, 2 200 mingga yaqin fuqaro bevosita Senatning o‘zida qabul qilingan. Ular ko‘targan muammolar sud, prokuratura, MIB, IIB, SSV, Bandlik, Kadastr va boshqa tashkilotlar mutasaddilari ishtirokida hal etilgan.

“Senatorlar har oy hududlarda bo‘lib, fuqarolar bilan uchrashmoqda. Mazkur amaliyot doirasida 2 700 mingdan ziyod murojaat (ijtimoiy himoya, bandlik, kredit) alohida nazoratga olinib, hal qilish choralari ko‘rildi”, — deya maʼlum qilgan Senat.