Samarqand viloyati bosh imom-xatibi Zayniddin Eshonqulov avtohalokatga uchrab, ahvoli og‘ir ekani to‘g‘risida ijtimoiy tarmoqlarda turli xabarlar tarqaldi. Ayni vaqtda haj safarida bo‘lib turgan farzandi uning sog‘lig‘i to‘g‘risida ma’lumot berdi.
Unga ko‘ra, Zayniddin Eshonqulov haqiqatan ham avtohalokatga uchragan. Biroq internet orqali tarqatilayotgan turli xabarlar yolg‘on ekani, uni davolatish uchun pul yig‘ilayotgani haqiqatga to‘g‘ri kelmasligi ta’kidlandi. Hozirda viloyat bosh imom-xatibining ahvoli yaxshi ekanini qayd etdi.
“Ushbu videomurojaatni 2023-yil Makka shahridan olyapman. Samarqand viloyati bosh imom-xatibi Zayniddin domla Eshonqulovning farzandi, ismim Nurimom, Toshkent shahri hojilariga ellikboshi sifatida hajga kelgan edim. Allohning sinovi bo‘lib otamni avtomashina turtib yubordi. Internet tarmoqlarida har xil yolg‘on, bo‘rttirilgan xabarlar tarqatilmoqda. Otamning ahvoli ancha yaxshi. Doimo suhbatlashib turibmiz, muloqotdamiz. Diniy idoramiz rahbariyati, diniy qo‘mita rahbariyati, qolaversa, Makka shahridagi ishchi guruh doimo hol-ahvol so‘rab, nazorat qilib turibdi. Internetda otamning sog‘liqlari uchun pul yig‘ilgani haqida ma’lumot tarqatilibdi, bu mutlaqo haqiqatga zid. Ikki davlat kelishuvlariga asosan har bir muolaja mutlaqo bepul tarzda amalga oshirilmoqda. Otamning ahvollari juda yaxshi”, — deydi Zayniddin Eshonqulovning o‘g‘li.
Izoh (0)