Xalqaro valyuta jamg‘armasi (XVJ) boshqaruvchi direktori Kristalina Georgiyeva 5-iyun kuni O‘zbekistonga tashrif buyurdi, u mazkur ma’lumotni “Daryo”ga tasdiqladi.
5-iyun kuni O‘zbekiston Markaziy bankida XVJning O‘zbekiston bo‘yicha missiyasining yangi tayinlangan rahbari Yassir Abdih bilan uchrashuv bo‘lib o‘tgan.
Tomonlar uchrashuvda mamlakatdagi joriy makroiqtisodiy vaziyat, pul-kredit siyosati chora-tadbirlari, davlat korxonalari va banklarini transformatsiya qilish va xususiylashtirish jarayonlari, shuningdek, inflyatsion kutilmalarni kamaytirish yo‘llarini muhokama qilgan.
Shuningdek ikki tomon makroiqtisodiy modellashtirish, pul-kredit siyosati vositalarini takomillashtirish va valyutani tartibga solish sohalarida hamkorlikka tayyor ekanliklarini bildirgan.
Xalqaro valyuta jamg‘armasi — Birlashgan Millatlar Tashkilotining ixtisoslashgan muassasasi bo‘lib, shtab-kvartirasi Vashingtonda joylashgan. Bu dunyodagi eng yirik moliya instituti hisoblanadi. XVJga 190 ta davlat aʼzo bo‘lib, uning tuzilmalarida dunyoning 133 davlatidan 2500 kishi ishlaydi. XVJ qisqa va o‘rta muddatli kreditlarni davlat to‘lov balansida taqchillik bo‘lganida beradi. Kredit berish odatda ma’lum shartlar va tavsiyalar to‘plami bilan birga keladi.
Georgiyeva 2019-yil 1-oktyabrdan boshlab 5 yilga XVJ boshqaruvchi direktori va ijroiya kengashi raisi lavozimini egallagan.