Karyera boshida ish qanchalik kam qoniqish keltirsa, qirq yoshdan keyin sog‘liq muammolari ehtimoli shunchalik yuqori bo‘ladi.
Sietlda o‘tkazilayotgan Amerika sotsiologiya uyushmasining yillik anjumanida o‘z tadqiqotlari natijalarini taqdim etgan Ogayo shtati universiteti sotsiologlari shunday xulosaga kelishdi.
Universitet matbuot xizmatining xabariga ko‘ra, tadqiqot mualliflari 6,5 mingga yaqin amerikalik fuqarolarning sog‘ligi, ishi va hayotining boshqa jihatlari haqidagi ma’lumotlarni tahlil qilishdi. Bu ma’lumotlar 1979-yilda, ishtirokchilar 14 yoshdan 22 yoshgacha bo‘lgan paytdan boshlab to‘plana boshlangan. Olimlar ishtirokchilarning 25 yoshdan 39 yoshgacha bo‘lgan davrda o‘z ishlariga munosabatini kuzatib, so‘ngra 40 yoshdan keyingi sog‘liqlarida qanday o‘zgarishlar yuz berganini o‘rganishdi.
Ishtirokchilarning taxminan 45 foizi ushbu davr mobaynida o‘z ishlaridan qoniqishmagan. Atigi 15 foiz ishtirokchi butun muddat davomida ishlashdan barqaror zavq olgan.
Olimlar aniqlaganidek, yoqtirmagan ish tufayli eng ko‘p ruhiy salomatlik zarar ko‘radi. Karyerasi boshida o‘ziga yoqmagan ish bilan shug‘ullangan odamlar, sevimli mashg‘uloti bilan band bo‘lganlarga qaraganda, 40 yoshdan keyin uyqusizlik, ortiqcha xavotir, tushkunlik va hissiy muammolardan ko‘proq aziyat chekkan.
Tadqiqot mualliflarining ta’kidlashicha, yaxshi yangilik shundaki, 40 yoshdan keyin o‘zini yaxshi his qilish uchun ishga bo‘lgan munosabatning o‘zgarish yo‘nalishi muhim ahamiyatga ega. Agar dastlab ish sizga yoqmagan bo‘lsa-yu, keyinchalik uni asta-sekin sevib qolsangiz, keksayganingizda ruhiy salomatligingizga hech qanday salbiy ta’sir ko‘rsatmaydi. Aksincha, agar yillar davomida ishingizdan asta-sekin ko‘nglingiz qolgan bo‘lsa, 40 yoshdan keyin uyqusizlik va xavotirga duch kelishingiz mumkin, biroq depressiyaga tushib qolmaysiz.
Katta yoshdagi jismoniy salomatlikka kelsak, tahlil natijalariga ko‘ra, yoqtirmagan ish unga kamroq ta’sir ko‘rsatadi. O‘z ishidan doimiy ravishda qoniqmagan guruh a’zolari ishini sevadiganlarga qaraganda ko‘proq bel og‘rig‘i va shamollashdan shikoyat qilishgan bo‘lsa-da, umuman olganda sog‘liq holati ikkala guruh a’zolarida taxminan bir xil bo‘lgan.
Izoh (0)